No.204/2021-2022

Lunglei the 20th April 2021 - Vawiin chawhnu khan Lunglei District Road Protection Squad chu an Chairman Lunglei DC Pu Kulothungan A hovin a office chamber-ah an thukhawm. He hunah hian Lunglei SP Pu Rex Zarzoliana Vanchhawng leh official dangte, tlawmngai pawl aiawhte leh khawtlang hruaitute an tel a ni.

Meeting-ah hian Lunglei khawpui chhung kawng humhalh chungchang leh mipui te an lo him zawk theihna tura hmalak dan tur sawiho a ni a.

Meeting kaihruaitu Lunglei DC Pu Kulothungan A chuan Lunglei khawpui thang zelah kawng humhalh tura tan lak a hun takzet a ni tiin mipuiten kawng humhalh a tul zia an hriata an zawm theih nan awareness campaign leh inspection uar taka kalpui chhoh a tul a ni, a ti.

Lunglei khawpui chhungah Inspection ngawrh taka kalpui ni se tih meeting hmasa (7^th April 2021) a lo rel tawh angin hei hi a taka kalpui dan tur sawiho a ni a. District Road Protection Squad member-te chu group hnih (2) ah inthenin thla khatah vawi khat tal inspection an nei thin dawn a ni. Lunglei khawpui chhunga vantlang kawng nek chep, tuiluankawr chhia, kawngpui dunga in sakna bungrua dah, parking phal lohna a motor hun, kawngpuia tui/thli luan tir etc te an enfiah anga, a tul angin action an la dawn a ni. Heng hmalaknate hi tlawmngai pawl leh khawtlang hruaitute rawn chunga kalpui zel tur a ni a. UD&PA Department chu kawng thenfai leh humhalh hnatlang hun remchang hmasa bera ko tura ruat an ni bawk.