No.2335/2020-2020

Vawiin chawhma khan DC, Kolasib pisaah District Task Force on Malaria te chuan Anti-Malaria Month hman dan tur relin thutkhawmna an nei a, Dr H Lalthlangliana’n a kaihruai a ni.

Dr H Lalthlangliana chuan Covid-19 vang a ramri vengin thlalai tam tak an riah chhuah mek lai hian, hri dang thihpui theih hlauhawm tak tak lak a inven nachang hriat a tul thu a sawi a,” Covid-19 kan do rual hian Malaria pawh fimkhur tak a kan do tel a ngai a ni” a ti. DC chuan, Kolasib chu ramri veng a riak chhuak thahnem tak an awm avangin Malaria endik ngawrh tak a kalpui a tul thu leh hemi kawng a mipuite hnen a thleng phak inzirtirna neih a pawimawh thu a sawi a. Border Safety Monitoring Team hnuaia ram a riak chhuak te leh huan, lo, ram kal a riak chhuak te kim tak a Malaria test an nih theih nan ruahmanna siam a nih tur thu a sawi bawk a ni.

Dr RK Lalthlamuana, District Malaria Officer chuan Kolasib district chhung a Malaria dona kawng a an hmalakna te a tarlang a, January atang a May, 2020 inkar khan thisen endik 4,124 neih a ni a, Malaria PF vei 6 leh PV vei 2 hmuh chhuah a ni a, Long Lasting Insecticidal Nets 48,131 sem chhuah a nih thu a sawi. Covid-19 do a ramri a riak chhuak te hman tur thosi len 289 pek a nih thu te leh heng riak chhuak te zing a mi engemaw zat chu an thisen endik sak an nih thu a sawi a, zan lam a duty te thleng a thisen endik sak ni tur a hmalak dan tur sawi ho a ni bawk. Dr RK Lalthlamuana chuan June thla hi Anti-Malaria Month a nih angin Sub-Centre hrang hrangah hemi pual a hmalak a nih dan te a sawi a, Malaria umbo nana pawimawh hmasa chu Thosi tih tlem leh rang tak a natna hmuhchhuah leh enkawl a nih thu sawiin hemi chungchanga mipuite hriattur pawimawh chu Anti-Malaria Month 2020 denchhenin, a zau thei ang ber a inhrilhhriatna tha neih a tul thu a sawi bawk a ni.

Dr Lalhlimpuia, CMO pawhin thu sawiin, Malaria umbona tur hian vengtin ah Accredited Social Health Activist (ASHA) te kaltlang a Malaria veil eh veiloh endik theih a nih thu te, vei an lo awm pawh a damdawi a thlawn a awlsam tak a lak mai theih a nih thu a sawi a, a duh tan mahni bial Health Sub-Centre theuh a in-report in damdawi hmang a mahni thosilen te a chhiah theih thu a sawi bawk a ni. CMO chuan, tupawh, kar hnih ai rei mahni khua riah chhuah san te chu Malaria test neih a tul thu a sawi a, kum hmasa aia Malaria vei an pun hret nachhan hi Covid-19 vang a ramri a duty, zan duty leh Lockdown vang a ram lam a riak chhuak an pun vang a nih theih thu sawiho a ni bawk a ni.

Attachment

  • Loading attachment...