No.7177/2020-2021 

Vawiin khan Mizorama lakluh thar Germ Shield siamchhuah natna hrik thahna disinfectant spray hmangin Information and Public Relations Department Office, Aizawl kahfai a ni.

Sawrkar, mipui leh tlawmngai pawlte tanhona avangin Mizoramah COVID-19 hripui darh zel tur venna kawnga hmalakna a hlawhtling hle a. Inkhuahkhirhna khauh taka kalpui thin pawh thlahdul chhoh mek zel a ni. Hetihlai hian he hripui hi khawvel pumah a la darh mek zel a, Mizoramah pawh a rem tak tak theih loh avangin mipuite kan fimkhur lehzual a tul dawn a ni. Mizoram mipuite himna turin COVID-19 leh natna hri leng dang laka vengtu turin kuta kan khawih fo thin kan chetlatna office, motor, biak in, school, chenna in leh a chhehvel kahfaina tur ram dang leh India ram chhung hmun danga an hman mek Germ Shield company chu Mizoramah lakluh a ni ta a. Vawiin hian a vawikhatna ni turin Information & Public Relations Directorate Office, Treasury Square, Aizawl chu he Germ Shield disinfectant spray hmang hian kah fai a ni.

Germ Shield Mizoram-in an hman mek disinfectant spray hi America rama siamchhuah, scientist ten a hmantlak ngei tih an finfiah tawh a ni a. ICMR Guidelines anga NABL accredited an ni. Disinfectant spray dang ang lo takin Germ Shield hmanga vawikhat kahfai tawh hmunhma te chu ni 90 atanga ni 120 chhung COVID-19 hri leh hri leng dang lakah a him tawk a ngaih a ni a. Bang, vawnchhan, dawhkan leh hmundanga natna hrik chambang 99.9% a that a, kahfai a nih hnuah natna hrik bacteria, virus leh fungus kai thar lakah pawh ni 90 atanga 120 chhung chu a veng thei a ni. Kahfai a nih atanga minute 15 hnuah disinfectant hi kutah leh taksa dangah a kai thei lo. Environmental Protection Agency, USA chuan mihring taksa hriselna atan a him tawk tih zirchianna atangin an finfiah tawh a ni.

Germ Shield Mizoram hian mipui rawngbawlna peng pakhat atan naktuk hian a thlawnin Aizawl Traffic Police Station, Dawrpui an kapfai leh dawn a. Anni hi mipui a duh apiang tan dawr theih an ni a. Social media platform hrang hrang instagram, facebook leh a dangte kaltlang awlsam taka biakpawh theih an ni.