Khawvel pumpuia hrileng danna damdawi pekchhuah (vaccination drive) lian ber tur "COVID-19 Vaccination Drive" chu vawiin chawhma dar 10:30 khan Prime Minister Narendra Modi-a'n New Delhi-ah a hawng a, hemi pual inkhawm hi Mizoram chhunga COVID-19 vaccine pekchhuahna tura ruat zinga hmun 5 ah vawiin chawhma dar 9:00 khan neih a ni.

COVID-19 Vaccination Drive neih tan pual inkhawm Aizawl Civil Hospital Auditorium-a buatsaih ah Health Minister Dr. R.Lalthangliana chuan hman puiin Mizoram-in COVID-19 hrileng do kawnga hma kan lakna hi a chhuanawm takzet a, Sawrkar hotulu ber Chief Minister kaihhruaina hnuaia Zoram mipui zawng zawng kan tangrual a, COVID-19 tluka Mizo mipuite thukhat vuana min tanrual tirtu an awmin ka hre lo a ni, a ti a. Sawrkarin mipui mar dek chung leh mipui aiawh sakhaw hruaitute bakah tlawmngai pawl hruaitute rawn chungin hma a la thin a, heng hmalaknate mipuiten kan thlawp that avangin dinhmun tha takah kan ding a ni, a ti. Khawvel ram hrang hranga mithiam rual ten COVID-19 hri danna siam chhuah tumin theihtawp an chhuah a, India ram pawhin nasa taka tan la in COVID-19 kan hmelhriat atanga kum khatna ah hri danna chihnih a siam chhuak ta a. heng hri danna te hi uluk taka enchhinna kalpui a nih avangin a him tawk a ni tih sawrkar laipuiin a puang a, keini pawhin ngaihngam takin kan lo dawnsawn a pawimawh a ni, a ti bawk. Minister chuan COVID-19 hrileng dona kawnga theihtawp chhuahtute zawng zawng chungah leh Zoram mipuite chungah lawmthu a sawi a, kan thuawihna leh kan tanrualna in rah tha a chhuah a, thla thar atang chuan Biakin leh sakhaw hmunahte inkhawm kan phal tawh dawn a, fimkhur taka ruahmanna kan siam ang angte tha taka kan zawm tlan chuan reilote ah mumal leh fawmkim zawkin kan inkhawm theih thuai ka beisei a, chutiang bawkin zirna in pawh karleh mai atangin kan hawng tan dawn a, a bul kan tan that chuan a hlawkna kan tel zel dawn a, inkaihhruaina dan kan thlahdul hret dawn avang leh vaccine a awm tak avang hian inthlahdah tur erawh kan ni lova, fimkhur taka kan awm chhunzawm zel erawh a pawimawh hle a ni,a ti.

Report petu Dr. Eric Zomawia, Mission Director, National Health Mission chuan  India ramah COVID-19 vaccine chihnih Covaxin leh Covishield hman tur a nih thu sawiin, Mizoramah chuan Covishield kan dawng a ni, a ti a. Vaccine dawngtu tur thlan chungchangah State sawrkarin thu leh hla a nei lova, central sawrkarin an rawn thlang vek a, a dawngtur diktak ten an dawn ngei theih nan election mode in  kalpui a ni a, vaccine dawng hmasa tur te'n an mobile phone ah sms an dawng a, vaccine lakna hmun tur hrilh an ni bawk a, Vaccine la turte'n Aadhar card leh ID Card an neih angte an ken ngei ngei a tul bawk a ni, a ti.

Vaccine hi dose hnih (vawihnih) pek tur an nih thu sawiin dose khatna an dawn hnu ni 28 ah dose hnihna pek leh tur an ni a, dose hnihna an dawn atanga ni 12 hnu ah vaccine hian a thawh tur ang takin a thawk dawn chauh a, hei vang hian vaccine late pawh an fimkhur zui rih zel a tul dawn a ni, a ti a. Tun tuma dose 18500 lo thleng hian vaccine dawng hmasate chan tur dose hnihna a keng tela, healthcare workers tun tuma vaccine la dawnglote pawh an hun a thlen hun tur dawhthei taka nghak tura chahin database a hming dah luh zawng zawng chuan an dawng vek dawn tih a sawi a ni.

Vawiina COVID-19 Vaccination Drive neih tan puala inkhawm Aizawl Civil Hospital Auditorium-a buatsaih hi Commissioner & Secretary, Health department Pu H. Lalengmawia'n a kaihruaia, Dr. Lalzawmi, State Immunization Officer in lawmthu sawina hun hmangin a khar a ni. Hun hman zawh a nih hnu hian Prime Minister Narendra Modi-a'n New Delhi atanga COVID-19 Vaccination Drive Virtual National Launching a neih chu online in chhim nghal a ni a, hemi zawh veleh hian vaccine dawngturte hnenah pekchhuah chhunzawm nghal a ni.

Vawiina Vaccine pekchhuah hmasak berna hun hi Mizoramah chuan Aizawl Civil Hospital, Lunglei Civil Hospital, Zoram Medical College, Kulikawn Sub-District Hospital leh ITI Urban PHC ah te hman niin healthcare workers 500 in vaccine hi an dawng a, karleh thawhtani atangin Mizoram chhung district zawng zawngah kalpui chhunzawm a ni ang a, a thawhkhatna a vaccine dawngtur healthcare workers mi 8000 chuang hi January thla chhunga pek kim vek tur a ni.