No.5003/2020-2021 

Hnahthial District Task Force on Covid-19 chu an Chairman leh District Bawrhsap ni bawk Pu Vanlalmawia kaihhruaiin Hnahthial DC Quarter-ah nimin chawhnu khan an thukhawm a, Covid-19 darh chho mekah mipuite himna tur hmalak chhunzawm zel dan tur an sawi ho a ni.

Meeting kaihruaitu Pu Vanlalmawia chuan Covid-19 hrileng chuan "Mizoram min luhchhuah mek avangin mitin te kan inralrin a tul zual hle a, Hnahthial District mipuite pawh kan fimkhur thar zela kan inbuatsaih thar reng a tul a ni" tiin thil reng reng hi lo thlir lawk a,  ruahmanna tha tak nena hmachhawn thin a pawimawh thu a sawi bakah Covid-19 chuan Mizoram min chenchilh tawh avangin mipui vantlangah darh huk thei a nih thu leh sawrkar ruahmanna zawma fimkhur a tul thu a sawi a  ni.

Meeting-ah hian Member Secretary, Dr.Lalrengpuii Ralte, Medical Nodal Officer Dr. R.Lalsanglura leh Pu Bijoy Gurung SDPO Hnahthial te chuan Covid-19 do kawnga DLTF Hnahthial hmalakna hrang hrang an tarlang a, contact tracing chhui a nih thute an sawi a,  mipuite chu fimkhur leh inralrin a ngaih thu uar takin an sawi bawk a ni.

Report-a tarlan danin Hnathial District chhungah hian State pawn atanga rawn hawng mi 263 te chu Quarantine niin heng zinga mi 236 te chu an hun hmang zovin chhuah tir an ni tawh a, mi 27 te chu Quarantine mek an la ni. Hnahthial District mi leh sa Covid-19 hri kai leh kai lo endik tawh hi ZMC-a RT-PCR-ah mi 248 awm tawhin mi 2 te chu an positive tih hmuhchhuah a ni a, Covid Care Centre ah enkawl mek an ni. Heng bakah hian Rapid Antigen Test hmanga endik mi 56 leh TrueNat Laboratory hmanga endik mi 8 an awm tawh a, positive an la awmlo thung a ni.

Meeting chuan Village Council inthlan zawh a nih tak avangin Hnahthial District chhunga VLTF tin te chu tan la thar theuh turin ngen nise an tih bakah midangte nen in contact chungchangah mitinte fimkhur a tul thu te tarlan niin hmai tuam, kut silfai leh Social Distancing ngai pawimawh turin mitin te an ngen a. VLTF tin ten an huamchhung theuha an kalpui tur ruahmanna hetiang hian an siam nghal bawk a ni :-

1.       Engemaw avanga sulhnu chhui a awlsam leh chak zawk nan mahni veng leh khua a lut leh chhuakte uluk taka chhinchhiah ni se.

2. Mahni veng/khua atanga loh theih loh avanga zin chhuak te chu Sorkar-in ruahmanna a siam Standard Operating Procedure (SOP) zawm ngei turin hrilh hriat thin ni se.

3. Bungraw chah leh lakluh te pawh SOP-in a sawi anga lak leh dawnsawn a nih ngei theih nan mahni area theuhah hmalak ni se.

4.    Lockdown emaw Partial lockdown zawnga hmalak loh theihloh a awm a nih chuan District Magistrate/ Deputy Commissioner hrilh hriat hmasak thin nise.

5.     Engemaw avanga sulhnu chhui ngai a awm a nih chuan Contact tracing lama Medical in-charge Dr.R.Lalsanglura MO, Hnahthial (Ph. No. 9862327400) leh Police lam in-charge Pu Bijoy Gurung, SDPO Hnahthial (Ph.No 9612328381) hnenah rang takin hrilh hriat thin ni se.

6 Mahni Veng/Khua a sum dawng leh dawr kaite chu an mahni dawrtu chhinchhiahna fel fai tak nei tura hriattir ni se.

7. Covid-19 hrileng hi mipui vantlangah darh huk thei a nih reng avangin mahni Area theuh mipuite chu an him theihna turin sorkar ruahmanna te zawm tur leh hmai tuam, kut silfai leh Social Distancing te nunpui turin inhrilh hriat tam ni se.

Attachment

  • Loading attachment...