No.5137/2020-2021 

Siaha; September ni 16: Vawiin chawhma dar 11:00am khan DRDA's Conference Hall-ah district bawrhsap Pu Kesavan R, IAS hovin VLTF hruaitute leh concern official ten meeting an nei.

Vawiin meeting chuan  mipui ten Social distancing, face Mask vuah leh hand sanitizer hman chungchangah te, pawnchhuah khap hun (8:30pm-4:30am) zawm that chungchangah te leh Sawrkar inkaihhruaina hrang hrang an zawm that theih nan tunaia duty ngawrh leh zual turin meeting chuan VLTF te  a ngen.

Dawr tinah customer ten an hming,address leh phone no. ziahna tur an dah te chu customer leh dawrkai ten an zawm tha em? tih VLTF leh Police ten surprise checking neih thin se, Vengtin information centre atangin Covid-19 laka kan him theih nana Sawrkarin inkaihhruaina a siam te chu  zawm theuh tura hriattirna mipui hnenah atam thei ang bera puan reng thin ni se, tih te meeting chuan a rel bawk.

Bungraw phur lirthei district chhunga lo lut reng reng Police leh VLTF ten Covid-19 guidelines zawm chungin lo vil chhunzawm zel se, ti a rel a ni bawk.

State pawn atanga lo haw chu  Gov't QF-ah khunghran zel an ni a. Vawiin atang chuan Aizawl atanga lo haw te reng reng an  contact history te an zirchian hunah;  an thlenna/chenna veng  VLTF  theuh ten ni 7 chhung an lo Home quarantine zel tawh ang.  Amaherawh chu Home Quarantine a awm te hi Covid-19  symptom  an nei te a ni lo chuan an blood sample an test kher loh tur thu medical lam chuan an tarlang bawk.

Hmun pawimawh laia zan lama Police  an duty thin hi meeting chuan lawmawm a ti a, chhunzawm zel turin a ngen nawn leh bawk.

Covid-19 laka Khawtlang himna hi Chhungkaw himna atangin a intan a, chhungkaw himna hi mimal himna atangin a intan a ni. Mimal himna hi  fimkhurna leh sawrkar  inkaihhruaina dan zawmthat-ah a innghat a ni tih puangzartu leh zawmtu-ah tang theuh turin vawiin meeting  chuan siaha district mipui te a ngen nawn leh a ni.