No.1025/2020-2020

Vawiin ni 12th leh nimin 11th May 2020 khan Dr. ZR Thiamsanga MLA, Vice Chairman, Health and Family Welfare Board leh Chairman, COVID-19 Medical Operational Team chuan Champhai North huam chhunga khaw hrang hrang, ramri a duty post hrang hrang leh Village Level Task Force duty post a tlawh chhunzawm zel a. Nimin leh vawiin lam khan heng khaw hrang hrang Hnahlan, Khuangphah, Diltlang, North Diltlang, Vaikhawtlang, Selam, Tualcheng, Lungphunlian leh Pamchung VLTF duty post tlawhin, an harsatna te leh COVID-19 hripui Mizoram-a rawn luh lohna tura theihtawp an chhuah dan te an sawiho a ni.

Dr. ZR Thiamsanga chuan hri puiin ram economy nasa taka a nghawng avangin ei leh bar zawn chung changah pawh nakkum lamah harasatna Mizoram-in a tawh loh nan leh buh leh bala tam zawk kan thar chhuah theih nan uar leh zuala thlawhhma pawh lak belh a tul thu a sawi a. Dr. ZR Thiamsanga hian Hnahlan ram a India leh Myanmar ram inrinna, Tiau lui a ralven buk hrang hrang hmun ruk te a hmunah tlawhin, ramri a duty te chuan Myanmar nen kan inhnaih avang a awlsam taka rawn luh mai theih anih avang a duty post pawh siam belh annih thu te an sawi bawk a ni.

Vaikhawtlang YMA President leh VLTF Chairman Pu Liansiama Varte chuan Mizoram leh hnam him nan chuan thisen far tawp thlenga beih an inhuam thu leh khawtlang atangin he hri hi a chhuak tur a ni lova, a rawn lut bawk tur a ni lo, tiin a sawi a ni.

Dr. ZR Thiamsanga hian khaw tin a VLTF te mamawh Solar light, buhfai, torch light bakah thil tul hrang hrang a hlan nghal zel bawk.

Dr. ZR Thiamsanga hian Indo Myanmar border bakah Laliphai, Mizoram ei bel ni thei tur Hnahlan ram chhunga phai zau tak chu tlawh nghalin, hetiang ang a phai zau tha, chhawr tangkai mang lova a awm chu chhawr tangkai thuai tul tih thu a sawi a. Chief Minister leh Agriculture Minister pawh hun remchang hmasa bera he lai phai zau tak chhawr tangkai dan tur leh a hmun ngei a tlawh tura sawm a tum thu a sawi a ni.

Mizoram chhungah pawh COVID-19 vang a mipui chet zung zung a harsat avang leh mipui mamawhna a nasat em avangin khaw tinah Dr. ZR Thiamsanga MLA hian khaw chhung leh feh kawng thlengin damlo a en nghal zel a. Tualcheng khuaah damlo mi 50 zet a en zawh hnuah Village Level Task Force te nen inkawmhona hun an hmang thei chauh a ni.