Covid-19 chungchanga hmalakna leh dinhmunte zir chiang tura Mizoram hmun hrang hrang tlawha zin kual mek Covid-19 Medical Operational Team te chu an Chairman Dr.ZR.Thiamsanga MLA hovin vawiin khan Hnahthial tlawhin Hnahthial District Task Force Chairman leh District Bawrhsap ni bawk Pu Vanlalmawia kaihhruaiin District Hospital OPD Building ah inkawmhona neih a ni.

He hunah hian Dr.ZR.Thiamsanga chuan District Level Task Force leh Village Level Task Force hmalakna te chu lawmawm a tih thu sawiin " kan report pek tawhah sorkar beng a verhin a ngaihpawimawh em em a, a theih ang angin sorkarin a bawhzui nghal a, a lawmawm takzet a ni" tiin  "Chief Minister Pu Zoramthanga leh Health & Family Welfare Minister Dr.R.Lalthangliana te hmalakna chak tak avangin Mizoram ah chuan hma taka inbuatsaihna kalpuiin lockdown te hman a ni a, kan mi tlawmngai rualin ramri te vengin  tun dinhmun hi kan thleng a ni. State hausa leh changkang kan tih zawk thenkhatte inbuatsaihna aiin Mizoram inbuatsaihna hi a fel fai zawk a, Pathianin kan ram hruaitute finna a pe zel niin a lang hi a lawmawm takzet a,  Mizo mipui nawlpui pawh he natna do kawngah hian kan thangharhin midangte tanpuina kawngah te kan inhawn zau zia a lang chho zel a. VLTF tlawmngai taka duty te an fakawm takzet a ni" a ti bawk. Hnahthial District Task Force hmalakna chu lawmawm leh tha a tih thu Medical Operational  Team Chairman Dr.ZR.Thiamsanga chuan a sawi bawk.

He hunah hian Hnahthial District Task Force member Secretary Dr.Lalrengpuii Ralte chuan an hmalakna hrang hrang report pein Medical Operational Team Expert Member-ten mipuite hriattur tul leh pawimawh te sawiin zawhna leh chhanna hun hman nghal a ni. Medical Operational Team hian Hnahthial DLTF ah hian Hand Sanitizer leh Mask engemawzat an hlan a, Hnahthial DLTF pawhin an mahni siam chhuah Mask 50 an hlan ve bawk a ni.

Inkawmhona neih zawh hian Hnahthial District chhunga ramri khaw hrang hrangte tlawh turin Medical Operational Team te hian Hnahthial an chhuahsan leh a ni.