No.85/2020-2021

Vawiin khan COVID-19 Operational Medical Team te chu an Chairman Dr. ZR. Thiamsanga, Vice Chairman, Health & Family Welfare Board hovin a pisa ah an thukhawm.

Meeting chuan tunah khunghran mek te, khunghran laia natna dangin a tlakbuak emaw, damdawiinah enkawl ngai emaw, zai(operation) ngei ngai an awm emaw thilah chung ho enkawl nan Urban Health Centre, ITI chu thuam that thuai nise an ti a. Hemi atana Building tihlen lailawk a tul chuan Director, Health Services in ruahmanna lo siam se tiin doctor leh staff mamawh ang pawhkhawm thei nan Director, Hospital & Medical Education in hma lo la se tiin an rel a. Urban Health Centre, ITI peih hma a, Home Quarantine laia insawiselna nei, damdawiin panpui ngai chi an awm in Medical Superintent, Civil Hospital, Aizawl emaw Medical Superintendent, State Referral Hospital, Falkawn emaw hnenah thlen nise an ti a. Khunghran ho te hi CMO East leh CMO West atangin Management Team ten nitin an tlawh thin a ni.

Sawrkar Laipui Ministry of Health & Family Welfare in Covid-19 damlo te enkawlna tur inkaihhruaina thar March ni 31, 2020 an tihchhuah chu meeting in an ngaituah zui leh a. He inkaihhruaina thara Case Definition Sub no. 4 in a sawi “All hospitalized patients with severe acute respitatory illness (SARI) (fever and cough and/or shortness of breath)” chu ngun takaan ngaituah hnuin tun dinhmun atan chuan la hman ngai lo leh la rem chiah lo nia hria in, a tul anga ennawn thuai nise an ti a. Ennawn hma chuan Ministry in March ni 17, 2020 a inkaihhruaina dan an tihchhuah chu la kalpui rih nise an ti.

Health & Family Welfare Department in Helpline an kalpui mek chu mipuiin an chhawr tangkai lehzual nan duty leh telephone te dahbelhin Helpline hi thuam chak nise an tiin meeting in a rel bawk.