No.84/2020-2021

Vawiin khan Pu Ram Nath Kovind, President of India chuan Video Conference kaltlangin State leh Union Territory a Governor leh Lt Governor zawng zawng te COVID-19 dona kawnga an hmalak mek chungchang a sawi pui a. Central Sawrkarin State leh UT te hnenah hmalakna tur pawimawh zual a hriattir bawk a ni. Pu M.Venkaiah Naidu, Vice President of India chuan Video Conferencing hi a kaihruai a. He hunah hian Mizoram Governor P.S. Sreedharan Pillai pawhin Mizoram hmalakna te sawiin Mizoramin mamawh zinga pawimawh zual te a thlen nghal bawk a ni.

President Ram Nath Kovind chuan COVID-19 dona kawngah tha thlah a thiang lova nasa zawka tan lak chhunzawm a tul thu a sawi a. Tun hnai Delhi Nizamuddin venga sakhaw pakhat puipunna avanga hrileng darh thut chu thil pawi tak a ni a. Hrileng darh zel tur dona kawngah sakhaw hrang hrang betute mawhphurhna san zia a ti lang chiang hle a ni a ti. President chuan Governor leh Lt Governor te chu an sate chhunga thil thleng leh hmalakna te uluk taka vil leh hre chhiang tura chahin sakhaw hruaitute leh NGO hruaitute pawh mipui zirtirna kawngah an mawhphurhna te hrilhhriat turin a chah bawk a ni. Vice President M Venkaiah Naidu pawhin thu hmahruai neiin Governor leh Lt Governor te chu video Conferencing hmasa lama a lo chah tawh te chak taka bawhzui chhunzawm turin a chah a. State chhunga Lockdown avanga harsatna lo thleng a awm pawhin state thuneitute hmalakpui vat turin a chah a. Nitina mipui mamawh ang chi te chatlak lova pekchhuah a nih theihna tur leh loneitute’n harsatna an nei a nih pawha tanpui dan kawng dapsak vat turin a hriattir bawk a ni.

Video Conferecing of Governors and Lt Governors-ah hian State leh UT Lt Governor te chu thusawina hun minute 6 theuh pek an ni a. He hunah hian Mizoram Governor P.S. Sreedharan Pillai chuan Mizoram chu he natna hrileng mek COVID-19 dona kawngah a harh hmasa pawl a nih thu a sawi a. Prime Minister Narendra Modi in Janata Curfew a puan hma karhnih vel atangin chak taka hmalak tan a ni a. Lockdown kalpui a nih hnuah pawh hmun dang angin sawrkar ruahmanna kalh zawnga hma la tumah an awm lova. Lockdown pawh duh khawp lovin fimkhur ngaizual bik district-ah te chuan Curfew puan a ni chhunzawm tih a sawi a. Lockdown leh curfew hi mipuiin a thlawp tha hle a; Kohhran lam pawhin sawrkar hmalaknate an thlawp pum hlum a, Biakinah inkhawm te ti tawpin puipunna programme zawng zawng pawh a ti tawp nghal vek a ni a ti. Nitin mamawh thil semchhuah kawngah tun thlengin hmalakna ah khaihlak a awm lova; Local Level Task Force ten hma lain mipui mamawh an pe chhuak thin tih a sawi a. COVID-19 hrileng a darh zel loh nan mi 2000 chuang chu thuawih takin in lamah an in Home Quarantine a. Hetih lai hian India ram pawna zin chhuak mi pakhatin COVID-19 a vei tih hmuhchhuah a ni a. Tunah hian that akin enkawl mek a ni a ti. Governor chuan, “Mizoram awmna hmun a kilkhawr deuh vangin harsatna thenkhat a awm ve a. Chung zingah mamawh langsar zual deuh chu COVID-19 Testing Laboratory, Medical Equipments, PPE leh Mask te a ni a. He harsatna min sutkian pui turin Central Sawrkar ka ngen nghal bawk a ni”, a ti.