No.6341/2020-2021

Vawiin chawhnu khan Chief Secretary's Conference Hall, MINECO-ah October ni 26, 2020 - November ni 9, 2020 chhunga hman tur "COVID-19 No Tolerance Fortnight" khauh taka hman dan tur ngaihtuahin thutkhawm a ni a, Medical Operational Team on COVID-19 Chairman Dr. ZR Thiamsanga'n he thutkhawm hi kaihruaiin Chief Secretary Pu Lalnunmawia Chuaungo, Additional Chief Secretary Pu JC Ramthanga bakah Finance, DM&R, H&FW, I&PR, Home department leh Local Council Association hotute an tel a ni.

India Prime Minister Narendra Modi-a'n tun thla ni 8-a a puan, India ram mipuiten COVID-19 dona kawnga nunphung thar kalpuina tur "Jan Andolan" a puan dungzuiin leh Mizorama COVID-19 hluar mek leh hri inkaichhawnna dan chah a nih theih na turin Mizoram sawrkar chuan kar hnih chhung COVID-19 No Tolerance Fortnight hman a rel a, hemi hun chhungn hian sawrkarin COVID-19 chungchanga inkaihhruaina a siam leh mipuite tih tur leh tih loh tur a duan te ngaihnathiamna awm lovin, a khauh thei ang berin kenkawh a ni dawn a. Heng bakah hian hemi chhunga mipuite zawm tur thupek thar tihchhuah a ni dawn bawk a ni.

Hemi hunchhung hian Traffic Police pawhin Mizoram chhungah No Tolerance Fortnight khauh takin an kalpui dawn a, lirthei document dik lo leh driving licence nei lova lirthei khalhtute an man dawn bakah, traffic rules bawhchhiate ngaihnathiamna tel lovin an man dawn a ni.

COVID-19 No Tolerance Fortnight chhung hian Office tinah COVID-19 dona banner/poster tar tur a ni a, vantlang hmun lun laiah hetiang banner leh poster hi tar tur niin, khawtin leh vengtinah vantlang aurinna hmangin mipuite zirtirna thu puanchhuah tur a ni bawk a, Police leh VLTF/LLTF te pawh khauh lehzuala duty tura tih niin, anmahni puibawm tur hian sawrkar hnathawkte pawh ruat an ni a, sawrkar pisa tina thawktu 30% theuh he hna thawk tur hian ruat an ni ang.

Hemi hun chhunga dan bawhchhiate chu “The Mizoram (Containment and Prevention of Covid-19) Ordinance, 2020" tlawhchhanin man an nihna hmuna hrem zel an ni ang.