No.6340/2020-2021

Lawngtlai, Khuangchawi thla ni 23, 2020: Vawiin khan Lawngtlai Bawrhsap Dr Andrew H. Vanlaldika hovin District Administration, police, medical, Central YLA leh veng thenkhat VLTF ai awhte chuan DC office chamber-ah tun hnaia Lawngtlai khawpui chhunga an kaina awm chin hriat loh COVID-19 positive hmuh chhuah belh chungchang leh, mipui vantlang zinga COVID-19 a darh zel loh nana hma lak dan tur an sawi ho.

Bawrhsap chuan state pawn atanga lo haw leh quarantine centre-a khung hran ni lo, zirlai sikul lut tur endik zinga tun hnaia positive 5 hmuh chhuah an ni chu a vanduaithlak tak zet tih sawiin, sawrkarin thil tul hrang hrang buaipuiin, medical team te'n ngawrh takin contact tracing an kalpui a, primary contact sample endik tawh zingah positive case hmuh chhuah a la ni lo tih a sawi a. Vantlang zinga hri a darh zel loh nan sawrkar, VLTF, tlawmngai pawl leh mipuite tan rual a tul tak zet a ni, a ti a. Mipuite chu tha leh zuala fimkhurna dan hrang hrang zawm turin a chah nawn leh a ni.

Senior Medical Officer Dr S. Thaizi chuan contact tracing an kalpui dan report pein, primary contact an chhui chhuahte chu tha taka an inkhung hran chuan mipui tan chi-aina tur a awm lo tih a sawi a. COVID-19 positive contact-te chu an in-contact atanga ni 5 atanga ni 10 inkara sample lak chauh tur a nih avangin medical team te'n a hun an tih hmaa innawr chiam chuan awmzia a nei lo va, medical team te hna thawh a tihbuai zawk avangin home quarantine lai te pawhin dawhthei taka nghak hram hram turin a ngen a ni.

He hunah hian vantlang zinga COVID-19 a darh zel loh nan hri kai hmuh chhuah tharte contact tracing tih chhungin mipuite chu khauh zawka inkhuahkhirh dan ngaihtuah ni se, tih a ni a. Hemi bawhzui nan hian Lawngtlai Bawrhsap chuan vawiin khan ni 24.10.2020 (Inrinni)-a Lawngtlai khawpui chhunga damdawi dawr leh thlai hnah/chawhmeh zuar ni lo dawr dang hawn leh inpho khapna thupek leh ni 25.10.2020 (Pathianni) zing dar 8 leh zan dar 6 inkara Lawngtlai khawpui chhunga phalna nei lo tana pawn chhuah khapna thupek te a chhuah nghal a ni.