No.6339/2020-2021

October 20-23 chhûngin Indian School Psychology Association (InSPA) leh Directorate of School Education tang dûn buatsaihin Mizoram chhunga Elementary School Teacher-te tân zan 4 awh: 'School Psychology' sawihona 'International Online Workshop on School Psychology: Mental Health and Learning disability' neih a ni.

He Online Workshop hawnnaah School Education Director Pu James Lalrinchhana chuan thu sawiin tunlai boruak nena inmil thupui pawimawh tak tak hmanga International online workshop neih a ni chu lawmawm a tih thu leh mithiam hrang hrangte thupui sawite, he International Online Workshop-a tel zirtirtu zawng zawngin an hlawkpui ngei a beisei thu a sawi a, thinlung takin Organising Committee chungah lawmthu a sawi. InSPA nen tangkawpa workshop neih hi a ?um thumna a ni tawh a, Education Department hnathawh that avangin InSPA atangin Directorate of School Education chuan "InSPA Educational Excellence Award, 2020" a dawng a, Dr. Rinpari Ralte, State Convener pawhin 'PA Sharma Best School Psychology Trainer Award, 202' a dawn bawk thu a sawi. He International Online Workshop atang naupangte dinhmun hrechianga a taka hmang nghal tura fuih chungin he Workshop hi a hawng.

Dr. Panch. Ramalingam, President, InSPA & Asia Pacific School Psychology, Malaysia chuan thu sawiin he International Online Workshop hi a taka tangkai taka zirtirtuten hmang ngei tur leh in lam thlenga zirlaite dinhmun hrechianga an harsatna tawhte sutkianpuituah tang ngei turin duhsakna a hlan.

School Psychology lama mi thiam bik resource person rawn tel-te chu:
1) Prof. B. Mukhopadhyay, Chennai
2) Prof. VSR Vijayakumar, Consultant Psychologist, Chennai
3) Dr. Lalitha Subramanian, School Psychologist, USA
4) Prof. Zokàitluangi, MZU
5) Prof. Lalfamkima Varte, MZU te an ni.

He Online Workshop hi Elementary School level-a International Online Workshop neih vawi khatna a ni a, zirtirtuten zirlaite-ah an put darh leh tur thu tha tak tak, tangkai tak leh hman nghal tur thil zirho a ni. Mizoram chhunga Primary School leh Middle School hrang hrang atangin Head leh Zirtirtu pahnih zel tel tura tih an nih angin an tel tha hle a, Participants hi mi 800 vel zet an ni.

Mizoram chhunga Elementary School Teachers puala buatsaih, International Online Workshop on School Psychology: Mental health and Learning disability hi October ni 20 zan atanga tan a ni a, vawiin October ni 23 hian khar a ni.