No.6338/2020-2021

Vawiin chawhnu dar 2 khan School Education Minister Pu Lalchhandama Ralte hovin Conference Hall, MINECO-ah meeting neih a ni a, tun hnaiah Covid-19 kai an pun avang leh zirlaite zingah hri kai an awm zel avangin 'No Tolerance Fortnight' hman hun chawlhkar hnih chhungin school chawlh leh rih phawt nise tih an rel.

Meeting-ah hian Covid-19 hrileng mekin zirlaite a kan kai dante thlir chungin hri inkaidarh a nasat zel loh nan October 26 atanga chawlhkar hnih chhung chu school khar leh nise, November 9, 2020-ah harsatna dang a awm leh a nih loh chuan school luh leh nise, tih rel a ni. Chawlhkar hnih chhung school kal loh chhung hian class X leh XII zirlaite tan hian online class kalpui zel nise, MBSE lamin Board Exam atana form fillup an kalpui mek nen a intihbuai loh nan ruahmanna siam nise, tih rel a ni bawk. October 12,2020 khan minister ho a meeting-ah Class X leh XII te tan October ni 16, 2020 atangin school tan nise tih rel a lo ni tawh a ni.

Minister chuan naupangte himna chu sorkarin a ngaih pawimawh ber a nih thu leh nu leh pate hlauhthawnna te, hriselna lama hotute hlauhthawnna te pawh an hriatthiam thu a sawi a, hostel neitute tan pawh fimkhur a tul thu a sawi a, inkaihhruaina an zawm that leh that loh te pawh enzui a nih dawn thu a sawi a; hostel-ah tuna awm laite bak mithar lak a rem loh thu a sawi bawk.

He meeting-ah hian School lama thawkten zirlai nu leh pa thenkhatten an fate school-a kaltir ngam lo an awm thu te, school compound chhungah SOP kenkawh a har thu te sawilan a ni a. Class an kal chhung reiloteah naupangten zir chakna an neih len tawh dan te sawi a ni bawk.

Meeting-ah hian School Education Commissioner & Secretary Pi Esther Lalruatkimi, School Education Director Pu James Lalrinchhana leh officer dangte, SCERT hotute, Higher Secondary School Principal Council hruaitute, HISSLAM, MISSTA leh MISA hruaitute an tel a ni.