No.6330/2020-2021 

Aizawl, the 22^nd October 2020 : Nimina Health & Family Welfare Minister Dr. R. Lalthangliana hova meeting in October ni 26 atanga kar hnih awh tur ‘COVID-19 No Tolerance Fortnight’ neih an rel bawhzuiin vawiin khan he hun chhunga thil kalpui dan tur chungchang inrawnkhawmna hun SAD Conference Hall, MINECO-ah neih a ni a. Chief Secretary Pu Lalnunmawia Chuaungo chuan meeting kaihruaiin Dr. ZR Thiamsanga, Chairman, Covid-19 Medical Operational Team leh Pu JC Ramthanga, Additional Chief Secretary hovin meeting hi neih a ni.

Dr. ZR Thiamsanga chuan Medical Operational Team ngaih danah chuan khawtlangah Covid-19 hi a taidarh tawh a, community transmission a awm tawh a, hemi chhuchat thei tura hma lakna tha ber chu inkharkhip niin an ngai a, mahse inkharkhip hi Sawrkar Laipuiin a phal tawh loh avangin khauh taka Covid-19 No Tolerance Fortnight kalpui a nih chuan engemaw chen hri taidarh tur hi a ven theih dawn nia an ngaih thu a sawi.

Chief Secretary chuan Covid-19 No Tolerance Fortnight neih chhungin COVID-19 dona atana sawrkar ruahmanna siam hrang hrang - Unlock guidelines, Standard Operating Procedure (mipuite zawm tur) hrang hrang leh The Mizoram Containment and Prevention of COVID-19 Ordinance, 2020 te chu khauh tak leh ngaihnathiamna tel lova kalpui a nih tur thu a sawi nawn leh a. Chumi atan chuan Police, LLTFs/VLTFs leh Sawrkar hnathawkte pawh a tul dan anga inruatin hmun hrang hrangah duty dan tur ruahman a nih tur thu a sawi.

Meeting ah hian he Fortnight neih chhunga thil kalpui dan tur rawtna hrang hrang te chu zau taka sawikhawm a ni a. Hemi atana ruahmanna lo duansa Action Plan pawh sawiho a ni a. Meeting ah hian puipuinna/chhiatni/thatni ah te mipuiin SOP an zawm tha lo chu a ngaihmawh awm thu te, sikul leh hostel luh hi tun dinhmunah a him loh thu te, zan curfew khauh zawk kalpui a tul thu te, dawr leh sumdawnna hmuna social distancing zawm a nih loh dan te chu thil dang bakah sawilan a ni.  Fortnight hi Prime Minister in a puan Covid-19 Jan Andolan Campaign nen kalkawp tura duan tum a nih thu pawh tarlan a ni.

Meeting ah hian Home, Disaster Management & Rehabilitation, Health & Family Welfare Department leh Police aiawhte leh Aizawl DC te an tel a. Naktukah hemi chungchang ruahmanna kalpui dan tur tifel turin meeting neih leh a ni dawn a ni.