No.6435/2020-2021

Vawiin chawhnu khan Health & Family Welfare Minister Dr. R.Lalthangliana hovin SAD Conference Hall, MINECO-ah COVID-19 positive te fa, hri kai ve si lo, in lama enkawltu nei si lote buaipui dan tur ngaihtuahin thutkhawm a ni.

Vawiin thutkhawmah hian COVID-19 positive nu leh pa CCC/DCH a dah ngai, an fate positive ve si lo, in lama enkawltu nei silo engemawzat an awm avanga an fate CCC/DCH a luhpui lo theilo an awm nual thu tarlan niin, heng naupang negative a CCC lut zingah COVID-19 sample test positive an awm tak thu tarlan a ni a. Tun dinhmunah CCC hrang hrangah naupang 7, anmahni enkawltu ber te an positive si avanga loh theih loh a dah luh an awm thu tarlan a ni bawk. Heng naupang zinga upa ber chu kum 13 niin, midang zawng hi kum 10 hnuai lam an ni.

Nu, naupawm lai COVID-19 positive, an fasen kalsan rem si lo te, chhungkaw member positive vek, nausen kum 2 mi chiah negative, kalsan theih si loh leh hetiang kaihhnawih case hrang hrang a awm theih thu leh case dang la awm thei te pawh sawiho niin, an chhungte nen tap chunga inthlah lova lungawi taka an inthlah theih a tul thu te sawilan niin, anmahni enkawlna bik hmun buatsaih a, ei leh in thlenga nutrition mumal tak an dawn thei a tul thu te sawilan a ni. COVID-19 positive zingah nu naupawm, hnute hne lai chuan an hruai theih thu leh hnutetui pek dan tur pawh mumal taka ruahman a nih thu tarlan a ni.

Vawiin thukhawm chuan hetiang dinhmuna ding naupangte enkawl dan tur a rang lama ngaihtuah a Standard Operating Procedure (SOP) siam tur committee an din nghal a, nihnih chhunga report thehlut turin an ti a ni.

Health Minister chuan COVID-19 chungchangah hian ngaihtuahna sen kim a har tih sawiin, vawiina tha deuh ni a kan hriat hi reilote ah siam that ngai a awm leh thin a, thil thar kan ngaihtuahna a awm phak lo te a rawn lang leh nawlh thin bawk a, kan thatpui dan tur ngaihtuah chungin theihtawp erawh kan chhuah reng a ni a ti.

Aizawl Municipal Area-a lockdown paWhsei chungchang pawh sawilangin Health Minister chuan, Sawrkarin Lockdown pawhsei hi a hreh khawp mai a, amaherawhchu zau zawka thlirin nunna a hlu ber si a, bengsika ngaihtuah nchung leh zau taka inrawn chungin lockdown hi pawhsei a ni a, pawmngpaw puang ngawt kan ni lo a ni tih mipuiten hriatsak se a duh thu a sawi a. Lockdown pawhsei avanga eizawnna kawnga harsatna tawk zawng zawngte ngaihdamna leh hriatthiamna a dil tih sawiin, ti lo ta ila harsatna lian zawk tawk thei dinhmunah kan ding bawk si nen, nunna kan ngai pawimawh ber lo thei lova, hemi atana a man kan pek ve a tul rih si a ni, tiin mipuite hriatthiamna a ngen a. COVID-19 hri danna (vaccine) siam chhuah a nih hma chuan mipuite pawh fimkhur zual zel tura chahin, kan dinhmun thlir chung zela kan that tlanna tur ber ni a kan hriat hi min zawm sak hram hram ang che u, tiin mipuite hnenah ngenna a siam bawk a ni.

Vawiin thutkhawmah hian Medical Operational team Chairman Dr. ZR Thiamsanga, MLA bakah Health Department leh Social department hotute, Indian Medical Association aiawhte an tel a ni.