No.3416/2020-2020

Vawiin ni 24.7.2020 khan Sports and Youth Services Minister Pu Robert Romawia Royte chu Aijal Club-ah Mizoram Football Association (MFA) Special General Body Meeting-ah Khuallian ni a, hun a hmanpui a ni.

Khuallian Pu Robert Romawia Royte chuan District thar pathum tiama Mizoram District sawmpakhat-in District Football Association (DFA) mumal tak a nei ta chu lawmawm tiin, DFA thar Saitual, Khawzawl leh Hnahthial DFA te chu a bikin a lawmpuiin duhsakna a hlan thu a sawi a, heng district thar pathum-ah hian Football Field tha siam mek niin phullem phah vek a ni dawn a ti a. Minister chuan Mizoram-in Sports Infrastructure a neih mumal loh avangin sports discipline hrang hrang tan infiamna ruhrel siam turin tanlak mek a ni, tiin a sawi a. FIFA tanpuinaa MFA Football Field Sairang Dinthar Venga siam mek chu lawmawm a tih thu sawiin, Minister  Sports Department-in Rs 30 lakh-in MFA field siam chu a tanpui tawh thu a sawiin, tha taka zawh thuai a nih a beisei thu a sawi bawk a ni. Mizoram hmun hrang hranga Infiamna ruhrel siam nan Sports Department-in sum a thawhchhuah tawh thu leh Externally Aided Project (EAP) atang pawha beisei mek a nih thu sawiin, hna pawh thawh tan chhoh mek zel a ni a ti a, Football Association te chu an hmun theuha Department leh Contractor te hnathawh lo vil ngun turin a sawm a ni.    

Sports Minister chuan COVID-19 avangin Football League leh Competitions te neih theih a nih loh vanga infiammite eizawnna a buai zo chu pawi a tih thu a sawi a. Infiammite chu beidawng mai lova a rem dan dana inla fit reng turin a chah thu a sawi bawk. Minister chuan tunhnaia Sports Policy siamthar leh sports chu industry status pek a nih avangin hmasawnna sum tam zawk beisei mek a nih thu a sawi a. Private company liante pawhin COVID-19 karah pawh Mizoram sports an rawn ngaihven tan hle a ni, a ti. 

Pu Robert Romawia Royte chuan Central Sorkarin New Education Policy a duan mek chu hman tan mai tura peih thawkhat a ni tawh a, chu New Education Policy ang chuan Sports chu zirna a ni tawh dawn a, subject pakhat a ni ve tawh ang. Tunhma zawngin Zirnaah sports chu Co-curricular activity tih thin a ni a, Education Policy thar ang chuan Curricular activity a ni ve tawh thung dawn a, zirna in hrang hrangah sports infrastructure siam a ngai nasa dawn a ni a ti.

Mizoram Sorkar chuan Sports discipline tinte huapzovin infiamna ruhrel a siam chho tan mek a. Chutiang bawkin sport promotion lamah pawh hma a la nasa zual dawn: Jeremy Lalrinnunga leh Lalremsiami te pawh International Level-a an chet that lawmpui nan leh Olympic-a tel pha tura tan an lak nan nikum khan sumfaia tanpui an ni a, Lalremsiami Rs 20 lakh leh Jeremy Lalrinnunga Rs 15 lakh Mizoram Sorkarin a pe a, a zawngchhangthlak hle a ni. Talent nei thate chu khalh bingin khawvel huapa Medal la thei tura chherchhuah kan tum ang Minister chuan a ti. Sports Minister chuan COVID-19 reh hunah Mizoram Sorkar, AIFF leh MFA te tangkawpin 'Laldenga NE Peace Cup' buatsaih tum a ni ang a ti bawk.

Sports Minister chuan MFA leh DFA hruaitu kalkhawmte chu Zone FA te leh an hnuaia Club hrang hrangte uluk zawka kaihruaia enkawl turin a fuih a, Tournament siam tam leh lutuk chuan sports hmasawnna a tihchhiat theih bakah thalaite zirna leh eizawnna thlengin a tihbuai theih avangin chintawk neih thiam a tul thu a sawi a, competition chauh khelh phur a tawk lova, taksa insawizawi leh inkhelh chu a nuna nunpui zawk a pawimawh a ti. Eizawnnaa hmang tur chi bik Infiammite erawh chuan nasa lehzuala an beih a tul a, Sorkar pawhin a pui zel ang a ti. Professional Boxer Lalrinzuala, Khawruhlian leh NT Lalbiakkima, Siaha tuna S.Korea-a training mek te chu an beiseiawm hle tih sawiin, Sawrkarin an pahnih hian Sponsor zawnpuiin a tanpui dawn tih a sawi bawk.

He hun hi Pu P.C Vanlalhruaia, Senior Vice President, MFA kaihhruai niin, Pu Zomuana Hnamte, President Serchhip, DFA chuan hunserh a hmang a. Pu Lal Thanzara, President, MFA chuan inlawmna leh  President Thuchah sawiin, Pu Lalnghinglova Hmar hnen atangin Secretary Report ngaihthlak a ni a. MFA Information & Publicity  Committee in a buatsaih kum kalta a MFA activity hrang hrang video clip en ho a ni bawk a ni.

Mizoram Football Association (MFA) hi Kum 1973 a din a ni a, MFA hian Committee peng 11 a nei mek a ni.