No.4477/2021-2022 

Aizawl 31st March 2022: Mizoram-a COVID-19 hri leng mek dinhmun chu State Disaster Management Authority chuan thlirin ziaawm lam a pan hret hret niin a hria a. Chutiang a nih tak avang leh India ramah pawh Covid-19 dinhmun a lo ziaawm zel bawk avangin eizawnna leh mihring nunphung nghawng nasa lo zawnga hma lak chhunzawm a nih theih nan Mizoram chhunga COVID-19 hri darh zel tur venna atana inkhuahkhirhna awm mek chu thlahdul hret ṭula hriat a ni a.

Dr. Renu Sharma chuan Chairman, State Executive Committee a nihna ang leh Disaster Management Act, 2005 hnuaia Section 22(2)(h) & 24 (l)-in thuneihna a pêk angin a hnuaia inkaihhruaina tarlante hi thuleh awm hma atana hman nghal turin a tichhuak. 

A. MIZORAM PUMA HMAN TUR INKAIHHRUAINA

1. Hemi hun chhúng hian ṭul lova pawn chhuah leh inlenpawh loh hram ni se.

2. Deputy Commissioner ten tualchhung dinhmun leh a ṭul dan azira Health & Family Welfare Department-in Covid-19 hrileng laka invenna tur inkaihhruaina ‘Operational Guideline for Containment and Surveillance Plan of Covid-19’ a chhuah ṭhin te chu uluk taka kenkawh a nih theih nan hma an la tur a ni.  

3. School leh zirna in dangte

1) School leh hostel te chu academic session thar, ni 5 April, 2022 aṭangin an hawng thei ang.

2) School leh Hostel chhunga hman tur School Department-in Standard Operating Procedure (SOP) a chhuah chu tha taka zawm tur a ni a. Zirtirtute, hnathawk dangte leh zirlai ten vaccine an lak vek theih nan hma a la ang.

3) Anganwadi leh Creche Centre te hawn theih a ni ang a, Social Welfare Department-in Standard Operating Procedure (SOP) a chhuah chu tha taka zawm tur a ni. Anganwadi worker te leh hnathawk dang ten vaccine an lak vek theih nan hma a la bawk ang.

4. Higher Education Institutions 

1) Higher Education Institutions (Universities, Colleges, Technical & Professional Institutions)-a Final semester zirlaite leh Department of HAMP, MZU hnuaia Ph.D course work  zirlaite tan class leh hostel hawn phal a ni. 

2)Higher Education Institutions (Universities, Colleges, Technical & Professional Institutions)-a Practical Subject student (UG&PG) te tan practical class leh hostel te chu April ni 1, 2022 aṭangin hawn phal a ni. 

3) Semester zawng zawng chu Higher & Technical Education Department ruahmanna in CAB uluk taka zawm chungin, academic Session July, 2022 a tan tur atangin offline class a hawn phal a ni ang.

4) Hemi atana hman tur SOP chu Higher & Technical Education Department-in a ruahman ang a. Zirtirtute, hnathawk dangte leh zirlaiten vaccine an lak vek theih nan hma a la ang. 

5. Sakhaw Biak In leh Inkhawm 

1) Kohhran Inkhawm pangngai chhun leh zanah neih phal a ni a, zing inkhawm pawh phal a ni. 

2) Chhun leh zanah inkhawmpui neih phal a ni. CAB uluk taka zawm ni se. Kohhran leh LLTF/ VLTF ten CAB/SOP Implementation Committee an din ang. 

3) Deputy Commissioner te thurawn ngaichang chungin, Kohhran te chu an veng/khua theuh va Covid- 19 hrileng dinhmun ngun taka thlithlai reng turin beisei an ni.

4) Inkhawmna leh Inkhawmpuiah te hian ruai buatsaih loh ni thei se.

6. Inneih inkhawm leh Mitthi Vuina 

Inkhawm neihna hmun inchhung (indoor)-a leng zat chanve (50% seating capacity) aia tam lovin phal a ni a, a theih chin chinah ei leh in sem loh ni se.

7. Sports inelna, tournament, adt. 

Sports inelna, tournament, adt. (indoor & outdoor) te chu phal a ni a, indoor bikah chuan entu mipuite chu infiamna hmun-a leng zat chanve (50% seating capacity) aia tam lova punkhawm phal a ni.

8. Mipui punkhawm

National/ State/ District level programme pawimawh, Mipui punkhawm-anniversary, birthday, adt. chu a hmun inchhung (indoor)-a leng zat chanve (50% capacity) ṭum khata punkhawm phal a ni.

9. Office hrang hrang:

1) Mizoram Sawrkar Office hnathawkte chu dan pangngaiin office an kai ang.

2) Mizoram Legislative Assembly Secretariat chuan an kal dan tur an ruahman ang.

3) Central Sawrkar office te leh Central PSU te chu Central Sawrkar thuchhuak angin an kal ang.

4) Gauhati High Court (Aizawl Bench) leh a hnuaia Court te chu High Court-in ruahmanna a siam angin an kal ang.

5) Kohhran/sakhaw hrang hrang office leh Private company/ office - consultancy services, adt. hnuaia hnathawkte chu dan pangngaiin office an kai ang.

10. Activity dang zawng chu CAB khauh taka kengkawh chungin phal vek a ni. 

B. THIL PAWIMAWH DANGTE

1. Aizawl khawpuia lirthei tlan dan

            Aizawl khawpuia lirthei tlan dan chungchangah chuan intlanchhawk ṭhin dan pangngai angin SP (Traffic)-in ruahmanna a siam.

2. Vaccination 

Mipui vantlang kan lo him zawk nan COVID-19 vaccine la la lo zawng zawng (target group)-te chu Sawrkar-in a thlawna vaccine lakna a ruatah te a hma thei ang bera vaccine la tura ngen leh beisei an ni. Deputy Commissioner ten an District ṭheuhvah mipui ten vaccine dose hnih an lak ngei theihna turin theihtawpin hma an la ang.

3. Zin veivah chungchang leh rampawn atanga Mizoram luh 

                        Zin veivah chungchang leh airport-a screening chungchanga inkaihhruaina te chu Health & Family Welfare Department, Government of Mizoram-in thuchhuah thar a siam ṭhin dungzuia kalpui zel tur a ni. 

4. Veng/Khaw Bil Inkhuahkhirhna

1) LLTF/VLTF ten he Order-ina inkhuahkhirhna a siam bak pelin anmahni thuin veng/ khaw bil inkhuahkhirhna hranpa curfew/ lockdown/ Containment Area/ Restricted Area an puang tur a ni lo.

2) He order/inkaihhruaina-in a huam baka veng/khaw bil bik tana inkhuahkhirhna khauh zawk neih tul tihna a awm chuan, a chhan leh vang chiang taka ziakin LLTF/VLTF ten an awmna District Deputy Commissioner hnenah rawtna an siam thei ang.

3) Kawngpuiin a paltlang khua/veng ten an khaw/veng kaltlanga khaw/veng danga kal tur zin veivak te leh an lirthei an dang tur a ni lo.

5. Emergency contact number

Tu pawhin harsatna an tawh thulhah State Control Room (Toll free 1070, landline 0389-2342520, mobile 7628072785 leh whatsapp 9366331931) leh COVID-19 (Medical) helpline number (Toll free 102, landline 0389-2323336, 0389- 2322336 leh 0389-2318336)-ah telephone-in an harsatnate an thlen thei ang. Heng number te hi entry point apiangah langsar taka tar thin tur a ni.

C. CAB KENKAWH CHUNGCHANG

1. Covid-19 hri laka kan himna tur atan mitin hian tih tur pawimawh tak kan nei ṭheuh va. Chung tih tur leh zawm tur COVID Appropriate Behaviour (CAB) te chu Annexure-ah tarlan a ni a, mitinin zawm ṭheuh tur a ni.

2. Sakhaw biak in, inneih inkhawmna hmun, mitthi vuina, sports inelna leh mipui punkhawmna hmun dangah te a bik takin hmui-hmai tuam hi zaiho leh mi zinga thusawi changin ṭha taka zawm tur a ni.

3. Mipui punkhawmna hmun, sakhaw biakna hmun leh puipunna dangahte chuan ṭha taka ‘Social distancing’ zawm tur a ni.

4. Activity hrang hrangahte hian hrileng laka kan him nan a mawhphurtu ten CAB/SOP uluk taka zawm a nih theih nan hma an la ang.

5. Office, dawr, hnathawhna hmun leh a chhehvel tihthianghlim leh faina kawngah a hmun enkawltu, thuneitu leh dawr neitu ten mawh an phur ang. Beauty parlour, spa, gym leh lu mehna dawr (Hair cutting salons/ Barber shops)-tea hmanrua leh bungraw hman ngun bikte chu uluk taka tihthianghlim (sanitize) reng tur a ni. 

D. INKHUAHKHIRHNA LEH HREMNA CHUNGCHANG 

He thupek zawm lote chu Disaster Management Act, 2005, Section 51 aṭanga 60 leh the Mizoram (Containment & Prevention of the spread of COVID-19) Act, 2020 leh IPC Section 188 hmangin hrem theih an ni.