No.54/2021-2022
Kan hriat angin Covid-19 hripui Thawh 2-na, Second Wave chuan khawvel ram hrang hrang nasa taka run mekin India ram ngei pawh nasa takin min tuam mek a, tun nikhat thil thu maiah khan India ramin Covid -19 Hripui leng kan hmachhawn tirh atanga nikhat thilthua vei kan ngah ber tum niin, mi 1,26,315 kai thar hmuhchhuah an nih laiin thizat pawh mi 700 (684) deuhthaw a ni hial a; state hrang hrangte pawh nasa takin a nuai mek a.
Tuna Mizoram dinhmun pawh chik taka ngaihtuahin dinhmun tha lo taka awm thei reng kan niin a lang. Tunah hian COVID RALKHEL DAR a vawi 2-na atan kan vaw leh ni se.
Tun April thla kan hman mek nisarih chhung lekah hian COVID -19 Positive mi 46 lai hmuhchhuah thar a ni a. Tun karkhat chhung vel leka COVID-19 kai thar hmuhchhuah hian February thla leh March thla pumpui a hmuhchhuahte a zat thaw thang a ni.
Heng zinga a tam ber hi Screening neihnahmun (Airport,Vairengte, Kanhmun) atangtea hmuhchhuah an ni.
Tun ni 7 kalta chhunga Positive kan hmuhchhuahte hi Mizoram pawn atanga lo lut mi 34 niin chu chu hmuhchhuah zawng zawng hi zaa 74% vel a tling hial a ni. Tin, kaina chin hriat loh mi 7 leh Positive Contact mi 5 an awm bawk a.
Kan dinhmun thlir hian mitin kan fimkhur lehzual a ngai ta a ni.
Covid -19 thawhhnihna ( 2nd Wave) kan hmachhawn mek hi COVID-19 ram pawn lama hrik chhuak thar leh India ram chhung ngeia COVID Virus insiam danglamte nena a khawnawta rawn thawk a nih avangin Hripui leng thawhkhatna ai khan nasa taka inkaichhawn awlsam zawk leh hun reilotea kan chhiatpui mai theih niin a lang.
India rama hripui leng mek hi COVID-19 hri pangngai bakah– UK, Brazil leh South African Strain te an niin state 18-ah bu an khuar mek a ni.
Mizoram dinhmun
Tunah hian COVID-19 hian kan state hi chhung lam leh pawn lamah min bei a; hun engemaw chen hrik kai kan hmuh mumal tawh loh hnuah leh kan inkhuahkhirhnate pawh loh theih loha phelh dul a nih telh telh laite, mipui lam pawhin fimkhurna kan tlakchham telh telh lai tak hi hun vanduaithlak tak pawh kan tih theih rualin Pathian rinchhanin tha thar nen kan lo hmachhawn a ngai ta a ni. Chuvangin -
1. A tul fe loh chuan zinchhuahte, puipunnaa kalte pumpelh a tul ang. Zin chhuakte pawh khawi hmunah pawh va fimkhura COVID-19 hi Mizorama rawn hawn lo tura tan la turin kan inchah nise.
2. Covid Appropriate Behaviour kan tih – Mask hman that, kut tihthianghlim leh midang hnaih loh hi himna atan a pawimawh em em reng dawn a; kuta thil khawih mai mai lo tur leh kan mit leh hmui hmaite pawh kutfai lo chuan khawih loh hram hram tur a ni.
3. Dawr, Bus leh taxi bakah midang nena thil inkhawih tawm theih lakah inven a tul zual zel a; vantlang inthiarnate pawh a theih hram chuan hman loh ni se.
4. Second Wave-a COVID-19 thawhdan hi a danglam deuh tawh avangin nawm loh hlek chuan inentir vat thin tur a ni.
5. Kan state chhungah kai inring lem lo positive an awm nawlh nawlh tak avangin mawhphurhna pawh mitin kutah a awm; kumkhat chhung ngawt sorkar kaihhruaina tha taka kan zawm thinte kha kan himna kulhpui a ni tih hriain tan la thar leh turin kan in ngen a ni.
