No.53/2021-2022

Aizawl, 8th April 2021: Vawiin khan Vanapa Hall, Aizawla programme buatsaihah ICT Minister Pu Robert Romawia Royte chuan Mizoramin IT zirna lama hma a sawn theih nan Mizoram chhung High School hrang hrang 71-te hnenah Desktop Computer Set-7, UPS-4 leh Printer-1 theuh a sem. Computer dawngtu High School 71 zinga 59 hi Aizawl khawpui pawn an ni.

Pu Robert Romawia Royte chuan zirna sikulah computer pawimawhzia hriaa sawrkarin school te mamawh phuhru tura a thlawna computer set a semchhuak chu lawmawm a ti a, a dawngtu school te a lawmpui thu a sawi. Computer thar dawng turin computer zirna awmlohna khuaa school tam tak thlan an nih chhan sawiin Minister chuan school zirlaite chauh ni lo, khaw chhunga thalai te pawhin an hman tangkai theih nan computer zir duh tan man chawia zirna hawn theih a nih thu leh scheme-in a phal sak thu a sawi a. A tul a nih chuan Computer dawngtu school te tan bik training buatsaih turin Department an inpeih thu a sawi bawk. Minister sawi danin ICT Department hmachhawp zingah Smart Class Room a tel a, sum sanction hmuh tawh niin High School thlan bikah siam a ni ang.

Heng Computer semchhuah tak te hi Ministry of DONER, North Eastern Council (NEC) Shillong hnuaia Project “IT Education programme for 150 Schools in Mizoram” atanga pekchhuah a ni a. He Project Implementing Agency hi Information & Communication Technology (ICT) Department hnuaia Mizoram State e-Governance Society (MSeGS) a ni. Vawiin Vanapa Hall programme-a computer semchhuah tak te hi a vain 537 a ni a, he project atanga cheng nuai 600 hi NEC in 100% a tum a ni.

Vawiina computer semchhuah tak configuration hi CPU Brand-ACER, Processor Core - i5, 9th Generation, RAM 4-GB, Hard Disk 1-TB, CD Drive, Keyboard, Mouse, Monitor 18.5 inches niin MS Office, Antivirus a telbawk a ni, Hei bakah hian Multi function Printer (Print, Scan & Copier) leh UPS 4 (pali) a keng tel a ni.

School hrang hranga Computer leh bungraw dang pek tur zawng zawng hian Aizawl a thleng kim vek tawh a, a semchhuahna hun hman zawh hian a rang thei ang berin ICT Department chuan School tinte anmahni hmun theuhah dah sakin Installation zawng zawng pawh a tihsak leh vek dawn bawk a. Computer dawngtu School te hian tuna School Session tan chhoh mek rual hian an hmang tangkai nghal thei dawn a ni.

Vawiin programme-ah hian ICT Special Secretary Pu Lalramsanga Sailo chuan kalkhawmte lawmna thu a sawi a. Sr.Informatics Officer Pu Vanlalringa’n technical report pein Chief Informatics Officer Dr Lalthlamuana’n lawmthu sawiin hun hnung a khar a ni.