No.7336/2020-2021

Khawzawl District Hospital huamchhunga Health Care Worker-te hnenah vawiin atang khan Covid-19 Vaccine Covishield pek chhuah tan a ni a. A hawnna hun District Hospital Khawzawla neih hi Bawrhsap Pu Zothanmawia chuan a telpui a ni. COVID-19 Vaccine hi Khawzawl District Hospital huamchhunga Health care Worker 147 in an la dawn a ni.

Pu Zothanmawia chuan COVID-19 Vaccine in Khawzawl District a lo thleng ta chu lawmawm a tih thu a sawi a. COVID-19 vang hian nikum March atangin tun thlengin nunphung buai mahse tunah hripui kai kan tlem chho zel a, Sawrkar pawhin inkaihhruaina a duante a thlahdul chho zel thei chu a lawmawm hle a ni, a ti a. Khawzawl District-ah COVID-19 kai hi mi 23 an awm tawh thu leh heng mite hi phailam atanga rawn haw vek an ni a, tualchhungah inkaidarh a awm lo tih a sawi a. DC chuan tun thla 10 chhunga hripui beihnaah leh invennaah Health Care Worker-te chu a thawk nasa ber leh a hah ber an ni a, Vaccine la hmasa ber tur an ni chu a lawmpui thu leh hemi kaihhnawiha thudik tawk lo leh thuthang awm thinte chu awih mai lovin, Doctor-te thusawi ring zawk turin a chah bawk a ni.

Vawiina Vaccine pek chhuahna puala inkhawm tawi buatsaihah hi Khawzawl District Medical Superintendent Dr. Frank Harris-a'n a kaihhruai a. Dr.PB. Zodingliana, District Immunization Officer, Champhai District leh Dr. Albert Lalzikpuia Ralte, Vaccine Cold Chain Manager, Champhai District te'n Vaccine chungchanga hriat tur tul pawimawhte an sawifiah a. WHO Consultant Dr. Adhikari chuan Health Care Worker-te chu vaccine 2nd dose an lak zawh hunah mipuite hnenah a hlauhawm lova, a him tih hrilh hre turin a chah a ni.

Session site khat zelah nikhatah mi 100  Vaccine pek chhuak tum a ni a. Vaccine latute hi First dose an lak zawh hnuah darkar chanve an awm hahchawlhtir zel a ni.