No.6829/2020-2021
Kolasib 9th December 2020: Vawiin chawhnu khan DC Conference Hall, Kolasibah Dr.H.Lalthlangliana, Deputy Commissioner hovin District Task Force on Covid-19 Vaccination, Kolasib district chuan thutkhawmna an nei a. Vaccine thlen hun a dahthatna tur te leh a pekchhuah dan tur a ruahmannate sawiho niin inpuahchahna tul ang angte peihfel a nih tawh thu tarlan a ni.
Dr.Lalhlimpuia, Chief Medical Officer, Kolasib chuan Vaccine awm hun a ngaih pawimawh hmasak tur, Health Care Worker 864 te chu vaccine la tur ziah luhna Co-Win Software-ah ziah luh vek an nih tawh thu a sawi a. Hengte hian vaccine an dawn kim hnuah Police, Task Force, Volunteer, thutharlakhawmtute, kum upa leh natna benvawn neite dah pawimawh hmasak an nih leh tur thu a sawi bawk a ni. Vaccine thlen hun a dahthatna tur hmun, a dah vawhna tur khawl leh hmanraw mamawh dang dah khawlna tur pawh ruahman fel a nih thu a sawi bawk a ni. Vaccine pekchhuah dan tur relna hi Block level-ah pawh January ni 15, 2021 hma a neih tur a ni dawn bawk a ni.
Dr.Doris Lalnunmawii Sailo , DMS hnen atangin damlo hospital dawrtute leh District Hospital, Kolasiba thawktute him zawk nan Covid-19 hri vei inringhlel te tan inentir dan tur ruahmanna ngaihthlak a ni a, casualty a kaltlang mai lovin, Covid-19 hri vei inringhlel te chu VLTF kaltlangin inhriattirna hmun siam ah endik hmasak phawt thin tur an ni dawn a ni.
Contact Tracing, Discharge protocol, Test kalpui dan chungchangte ngaihthlak a ni a, Home Quarantine leh Self Monitoring chungchang a inkaihhruainate sawiho a ni bawk a ni.
