No.6828/2020-2021

Kolasib 8th December, 2020: Vawiin khan Urban Development & Poverty Alleviation Department kaltlanga buatsaih Mizoram Cleanliness Competition, 2020 endikna kalpui mektu, Panel of Experts-te chuan Bairabi leh Vairengte an tlawh hnuah Kolasib khawchhung a faina kawnga hmalak dan te an endik chhunzawm a. Dr.H.Lalthlangliana, Deputy Commissioner hovin inkawm hona neiin Pu Gaston Vanlalhriatpuia, District Urban Development Officer chuan Powerpoint presentation hmangin DUDO hnuai a hmalakna hrang hrang hrilhhriatna hun a hmang bawk a ni.

Dr.H.Lalthlangliana chuan lawmman beisei vanga fai ni lovin fai vanga lawmman latu nih chu Kolasib district chhunga faina kawnga hmalakna thupui a nih thu sawiin, ”Inelna avanga faina kawnga hma la thut ni lovin fai hi nunpui turin hma kan la zawk a ni,” a ti. DC chuan Kolasib district chu Solid Waste Management dan mumal tak zawmna district a nih angin bawlhhlawh chu paih ni tawh lovin bawlhhlawh sawngbawl a nih zawk thu a tarlang bawk a ni.  

Pu Gaston Vanlalhriatpuia, DUDO chuan Kolasib District-in faina kawnga hma an lakna hrang hrang tarlangin intin atangin bawlhhlawh khawm thin a nih thu a sawi a, hemi kawngah hian nuho intelkhawm pawl (Self Help Group) te tangkai tak a hman an nih thu a sawi bawk a ni. Fai tur a inzirtirna kawng hrang hranga kalpui a nih dan te sawiin ODF plus hnuaiah vantlang inthiarna 20 sak a nih thu a tarlang bawk a ni. Kolasib khaw chhungah hian intinah bawlhhlawh tawih thei leh thei lo thliar hranna bawm sem vek a ni tawh a, veng tinah hriselna atana tha lo bawlhhlawh (Hazardous waste) paihna tur bik hun a ni bawk a ni. DUDO ruahmanna hnuai a faina kawng a zawm tur hrang hrang inzirtirna “Faina Kawtthler Campaign” te, Cleanliness week chhung a veng, office leh vantlang hmun tihfai a inelna kalpui dan te enho a ni bawk a ni.

Inkawmhona hunah hian Panel of Expert-te hian zawhna an neihte chhan nghal a ni a. Kolasib khawpui chhung hmun hrang hrang endikna neih a nih hnuah Kawnpui endik turin an chhuak lehnghal a ni.