No.6827/2020-2021 

Aizawl, the 9th December 2020 : Vawiin khan Social Welfare & Tribal Affairs enkawltu Minister Dr. K. Beichhua chuan State Social Welfare & Rehabilitation Centre Huntharah Oil India Limited tanpuinaa Self help Centre-a Skill Development Unit hnuaia Self Employed Tailoring Unit leh Computer & Desktop Publishing Unit te tihchangtlun chu a hawng a. Hemi hnu hian Centre chhung hmun hrang hrang te a fangkual a ni.

Dr. K. Beichhua chuan Centre a awm mek te chu harsatna hrang hrang an nunah an tawh avangin helai hmunah an awm nia a hriat thu sawiin midang aia sual bik emaw, chhe bik emaw, vanduai bikemaw a in ngai lo turin a fuih a. Khawvelah kan dam chhungin mi tupawhin sual kan do a, kan nitin nun kan in en let fo a ngai a, mahni insiam tha turin tupawhin tan kan lak a ngai a ni, a ti a. nunphung pangngaia an let leh nan leh khawtlang tan mi tangkai an nih theihnan helai hmun hi an tan hmanraw pawimawh tak a ni a, chuvangin Pathianin tum neiin  helai hmunah hian tum neiin a dah a, hun kal tawh te thlir let lova hma lam pana kal zel turin duhsakna a hlan a ni.

Minister chuan sawrkar flagship programme SEDP-ah hian Sawrkar chuan social security hi a ngai pawimawh a, chuvangin Social Welfare & Rehabiliation Board pawh din a ti a, Mizoramah ruihhlo ngai te, rahbi tleu te, humsual dai te chhawmdawl leh enkawl tur an tam thu leh anni enkawl tur hian Sawrkarin ke a pen mek a, hripui a kian hnuah nasa leh zawka tan lak tum a ni a ti bawk.

Skill Development Unit a training leh zirtirna te chu Centre-a awm mek ten helai hmun an chhuahsan hnuah pawh anmahni inchawm nan leh eizawn nana an hman theih thu sawiin Minister chuan helai hmuna training hi mahni kut kea an din theih nan a inbusatsaihna a tia ti. Centre a thawk te chu an fakawm nia a hria thu sawiin nasa leh zawla an rawngbawlna kawngah tan la turin Dr. K. Beichhua chuan a chah a ni.

Oil India Limited in CSR katlangin cheng nuai 11 man hu khawl leh hmanrua te hi Centre an pe a, Skill Development Unit hnuaia Self Employed Tailoring Unit leh Computer & Desktop Publishing Unit te tihchangtlun a ni. Self Employed Tailoring Unit ah hian puanthui leh khawl dang hrang hrang 25 an pe a, Computer & Desktop Publishing Unit atan Xerox leh khawl dangte an pe bawk a ni.

State Social Welfare & Rehabilitation Centre Hunthar hi Social Welfare & Tribal Affairs Department enkawl niin tun hma chuan Protective Home tih a ni thin a. He Centre ah hian hmeichhia kum 18 chunglam rahbi tleu te leh zu leh ruihhlo a harsatna tawk enkawlna hmun a ni a, danin a phal angin an fate kum 7 hnuailam an hruai lut thei bawk a. Mizoram Sawrkar hnuaiah hmeichhia humsual daite enkawlna hmun awmchhun niin hmeichhia 902 leh naupang 85 an lo enkawl tawh a ni. Centre-ah hian hmeichhe rahbi tleu ten eizawnna kawng an neih theih nan puanthui te, computer te, puan tah leh beauty culture te zirtir thin an ni. Tunah hian Centre ah hmeichhia 60 bawr enkawl an nei mek a ni.

Programme hi Commissioner & Secretary, Social Welfare & Tribal Affairs Pu H.L. Rochungnunga’n kaihruaiin Superintendent, State Social Welfare & Rehabilitation Centre Dr. R. Lalnunmawii chuan Centre chanchin te, an hnathawh dan te leh an hmalakna tlangpui a sawi a. Director, Social Welfare & Tribal Affairs Department Pi A. Vanlalzawni chuan lawmthu sawiin hun hnung a khar a ni. Minister hi Board Vice Chairman Pu K. Liantlinga leh Board Member Pu Lalthawmmawia ten an tawiawm a ni.