No.3372/2019-2020
Health & Family Welfare Board Vice-Chairman Dr ZR Thiamsanga chuan vawiin khan Mizorama COVID-19 veite enkawlna tura ruat Zoram Medical College (ZMC), Falkawn tlawhin Zoram Medical College inbuatsaihna a enpui a, H&FW Department Secretary Pu H. Lalengmawia leh Director Dr. Lalhmangaihi ten an tawiawm a ni.
Dr. ZR Thiamsanga chuan ZMC a tlawh chhan chu COVID-19 veite enkawlna tura ruat a nih bakah ZMC bakah Falkawn leh ZMC a thawk daktawr leh staff te thinhrikna tawngkam hriat tur a awm fo vangin an hlauhawm lova, an him tawk a ni tih mipuiten hria se a duh vang tih a sawi a. ZMC chu WHO leh sawrkar laipui duhdan anga uluk taka enkawl a nih thu sawiin a thawktute pawh mahni nunna thapin midang tan an thawk a, in lama an haw dawn pawhin dan ang thlapin uluk takin an intifai a, him tak leh hlauhawmlo an ni tih hriat a ngai a, an rilru tihnual thei zawnga tawngkam cheh lo turin mipuite a ngen a ni.
Dr. ZR Thiamsanga chuan tun dinhmunah COVID-19 test sample 28 thawn tawh a nih thu sawiin heng zinga result hriat tawh 26 ah pakhat a positive a, a bak zawng chu negative vek a ni a ti a, tunah hian result nghak mek pahnih a awm a, vawiinah test sample 12 thawn a ni ang a ti. COVID-19 vei enkawl mek pawh a dinhmun hlauhthawnawmah a awm lotih sawiin a nupui fanaute pawh test sample a negative hnu ah uluk taka enkawl zui an ni a, an hriselna a that bawk avangin an awmna veng Local Task Force ten en tangrualin an chenna in lamah quarantine tura chhuah tir an nih thu a sawi bawk.
COVID-19 laka inveng thei dinhmunah kan la ding niin a hriat a, hei vang hian India Prime Minister Narendra Modi leh Mizoram sawrkarin lock down a puan hi kan ngaihpawimawh a kan zawm that a pawimawh em em a ni a ti a, hetih kawnga sawrkar department hrang hrang, kohhran, khawtlang leh Local task Force te hmalakna fakin Sawrkar thu awih a pawimawh hle tih a sawi. ZMC inbuatsaih dan sawiin khum te inkar hlat deuh hlek a dah a tul avangin ZMC chu khum 150 awmna ah siam rih a ni a, ICU 7, NICU 5 siam niin ICU hi 24 a extend theih turin ruahmanna siam a ni a ti.
COVID-19 testing laboratory pawh IMCR in siam phalna a pek tawh thu leh, April ni 2, 2020 a hman tan theih tura chak taka hma lak a nih thu leh daktawr pahnih leh technician pahnih Silchar Medical College ah training neih tir mek an nih thu a sawi a. Mipuite chu kut silfai uluk tur leh social distancing zawm tha a khuh leh hahchhiau apianga hnar leh ka hup tha turin a chah a ni.
Health & Family Welfare Secretary Pu H. Lalengmawia pawhin COVID-19 do kawnga Mizoram mipuiten sawrkar an thlawp that avanga lawmthu sawiin social media a thuchhuah fimkhur tur leh social media a thuchhuahte vanga chi-ai mai thin lo turin mipuite a chah a, Information & Public Relations department kaltlanga thuchhuak a nih loh chuan COVID-19 chungchang social media a tarlante ring lo turin mipuite a chah a ni. Hei bakah hian State-level Task Force, District-level Task Force, Local task Force leh Media te thawhrimna avangin lawmthu a sawi a, mipuite chu invawng uluk a, fimkhur tur leh sawrkar thupekte tha taka zawm turin a chah bawk a ni.
