Chief Minister Pu Lal Thanhawla chuan Cricket hi eizawnna mai bakah hausak theihna a ni a ti. He thu hi Cricket Association of Mizoram (CAM) in Mahuma Memorial & Khaled Memorial Cricket Tournament a buatsaih, nimina final khelh Suaka Cricket Ground, Sihhmui a telpuina a lawmman semna a sawi a ni.

Chief Minister chuan infiamna lama hmanraw pawimawh, a infrastucture te kan nei tha chho ve zel a, hei hian thalai infiammite phurna siam sakin hlawhtlinna pawh kan hmu chho mek a ni a ti a. Thalai infiammite hi an chhuanawm a ni tiin, Pu Hawla chuan Association hrang hrang te hmalakna zarah kan inpho chhuak cho zela a lawmawm hle a ni a ti a. Cricket game bikah chuan Mizo thalai ten tun aia nasa leh zuala kan uar chhoh a tul a, a game hi Mizote tih theih chi a nih avangin tan kan lak chuan national levelah pawh kan thleng sang thei ngei ang tih ka ring a ni a ti.

Chief Minister hian Mahuma Memorial a a chak ber team hnenah leh Khaled Memorial a a chak ber hnenah trophy a hlan a ni.

Mahuma & Khaled Cricket Tournament hi 1st Division game a ni a, ni 6.11.2014 khan kelh tan a ni. Mahuma Memorial Tournamentah hian team 8 an chhuak a, Khaled Memorial Tournamentah hian team team12 an chhuak ve thung a ni. A game hi 20 Overs Match a khelh a ni a. Mahuma tournamentah hian Chanmarians chu champion an ni a, pahnihna chu Chaltlang an ni. Khaled tournamentah hian Chhinga Veng chu an champion a, pahnihna chu Ramhlun Venglai an ni. Man of the Series bakah Man of the Match lawmman te pawh sem a ni.

Lawmman semna hunah hian Under - 19 a Dimapura khel te chawimawina hun hman a ni bawk. Lawmman sem inkhawm hi CAM Vice President Pu Lalrochuanga Pachuau in a kaihruai a ni.