1013/2024-2025

Dated Serchhip, the 1st July, 2024: Dan bawhchhia te hremna dan thar pathum - Bharatiya Nyaya Sanhita (BNS), Bharatiya Nagarik Suraksha Sanhita (BNSS) leh Bharatiya Sakshya Adhiniyam (BSA) chu India ram pumah July 1, 2024 atang hian hman tan a lo ni dawn ta a. Serchhip District ah vawiin khan Home Minister Pu K.Sapdanga chuan heng dan thar hman tan hun puala function pawimawh tak, SP Conference Hall-a buatsaih chu khuallian niin a hmanpui a ni.

Pu K.Sapdanga chuan India ramin criminal law hun rei tak a lo hman tawh - IPC, CrPC leh Indian Evidence Act te thlak tu tur dan thar pathum hman tan a lo ni dawn ta chu India ram khua leh tuite leh Mizoram tan sual dona kawngah kalphung thar leh bung thar pawimawh leh chhinchhiahtlak tak a ni, a ti. India Sawrkar pian hmaa British Sawrkarin dan an lo siam tawh, kum za chuanga upa dan hlui kan neih te thlakna tur dan thar a lo chhuak ta a; dan hluia a tha lai te paih chuang si loin tunlai khawvel thiamna technology hman theih turin siamrem a ni, a ti a. He dan thar hian mipui mimir te thlavang na takin a hauh a, police te tha a tichak a, police te hna nasa takin a tipung a, sual bul intan hmeh mih nan sual lakah nasa takin a thikthu a tichhia a, a then laiah a thil phal viau laiin a then laiah a khauh em em a, ram leh mipui tana dan tha tak a ni dawn, tiin Home Minister Pu K.Sapdanga chuan he dan thar pathumte chungchang hi a sawi a ni.

Vawiin July ni 1 atang hian Indian Penal Code, 1860 chu Bharatiya Nyaya Sanhita, 2023 chuan a thlak ta a, Code of Criminal Procedure, 1973 chu Bharatiya Nagarik Suraksha Sanhita, 2023 chuan a thlak a, Indian Evidence Act, 1872 chu Bharatiya Sakshya Adhiniyam, 2023 hian a thlak ta bawk a ni.

Heng dan thar pathum te hian dan hmanlai tawh thenkhat a paih a, a then a kaikawp a, hmanlaia hriat ngai loh sualna thar lo chhuak te hremna a dah belh a. Pawi khawihna area nilo khawi police station ah pawh FIR thehluh theihna (Zero FIR) te, online hmanga police hnena FIR thehluh te, sms leh thildang hmanga inkoh (summon) te, dan bawhchhiate hremna atan vantlang tana thil tha tih Community Service te leh thil dang thahnem tak heng dan tharah hian dah belh a ni.

Dan thar chungchangah hian Serchhip SP Office huaihawtin training vawi sawm chuang neih a ni tawh a. Kohhranah leh tlawmngai pawl zingah awareness campaign neih niin neih zel tum a ni bawk.

Serchhip SP Pu M.S.Dawngkima kaihhruai vawiin programme ah hian Serchhip Addl. SP Pu Saidingliana Sailo leh Asst.Public Prosecutor Pu Laithanpuia ten heng dan thar pathum chungchang sawi zauna hun an hmang a. Inspector Pu R.Lalbiakhlua’n lawmthu sawiin hun hnung a khar a ni.