1012/2024-2025

LUNGLEI; the 1^st, July, 2024: Vawiin chawhma khan Govt. Primary School-II, Chanmari ah Stop Diarrhoea Campaign hawnna hun hman a ni. He hun hi Pi Lalrintluangi, District Education Officer, Lunglei chuan kaihruaiin Pu Lalramliana Papuia, MLA, Lunglei South chuan khuallian niin a hmanpui.

He hun ah hian Pu Lalramliana Papuia  chuan Pa chak tak pawh nise a hriselna a enkawl that loh va kut te a silfai loh leh thil thianghlim lo a ei chuan kawthalovin a thi ve thei a ni a ti. Kawthalo kan vei loh nan kan in enkawl that a ngai a, khawvel pumpuia naupang kum nga chin hnuailam thihna thlentu pathum zinga pakhat a ni. Mizoram-ah pawh nitin mi 140 vel kawthalo vei an awm a chuvangin fimkhur a ngaih thu a sawi. Kan in, ek in te vawn fai a, tho bawm hnu te ei lo tur leh  bawlhlawh bawm chhin nei hmang theuh turin a chah a ni. Health Department in July leh August, 2024 hi Stop Diarrhoea Campaign kalpui tur hi nuapang, nu leh paten zawm theuh turin a chah a. Faina leh thianghlimna  hi kan ngai pawimawh tur a ni. He beihpui thlak hi kan chanvo a nitih hria a, zawm theuh turin a sawm bawk. India ram-ah pawh kumtin mi singnga vel kawthalo vang a thi an awm thu a sawi. He natna do tur hian naupang, zirtirtu leh nu leh pa ten khawtlang tana hlauhawm kan nunna suattu do tur a Stop Diarrhoea Campaign kalpui hi a lo hlawhtlin theih nan theipatawp a lo tawiawm a lo tanpui theuh turin a sawm a ni.

Dr. Lalrinthangi, Dy. Chief Medical Officer, Lunglei pawh inthusawiin kum dangah chuan Intensified Diarrhoea Control Forthnight hman thin a ni a, kumin-ah chuan Stop Diarrhoea Campaign  July leh August thla chhung hman tur a tih a ni. Hemi chhung hian awareness tam zawk pek tum a nih thu a sawi a. India ram ah kum 5 hnuailam thi zingah hian 5.8% hi kawthalo vang anih thu  sawiin Mizoram ah pawh nitin kawthalo vei 140 an awm thu a sawi.  Nikum khan Lunglei Disrict a naupang kum nga hnuailam te hnenah ORS 100% pek a ni a, kumin ah pawh 100% pek tum a nih thu a sawi.  District Hospital, Sub-Divisional Hospital, UPHC, Sub Centre leh Anganwadi Centre ah te ORS-Zinc Corner dah vek a, Anganwadi Worker ten in tin-ah kal chilhin naupang kum nga (5) hnuailam  chin te ORS bur hnih leh Zinc ni 14 chhung ei an sem ang a, kawthalo hlauhawmzia leh invendan chungchang zirtirna an pe  ang. Kawthalo laka kan him theih nan faina leh thianghlimna ngai pawimawh theuh turin mitin te a sawm bawk a ni.