Ist Bn CRPF ten khawtlang tana thil tha leh chenfakawm an tihna kawng Civic Action Programme chu  Social Welfare Minister Pu PC Lalthanliana leh Law Commission Chairman Pu R. Lalrinawma ten hmanpuiin vawiin chawhma khan Zemabawka inkhawm buatsaihah hmanrua tangkai thahnem tak an sem.

Hmanraw tangkai tak tak a dawngtute hnena hlan paha thusawiin Social Welfare Minister chuan lawm taka thilpek dawng mai ni lova a tangkai thei ang ber leh a petu te rilru hre reng chunga hmang turin a chah a. Force pawimawh leh hlun tak te hian an khawsakna hmuna mipui te nen inthianthatna leh inunauna nghet tak siam an duh avangin heng khawtlang tana tangkai tur hmanraw tha tak tak te hi an sem thin tih hria a helam kawnga khawtual mi te pawhin an rilru an siam thar a duh thu Minister chuan a sawi a ni.

Vawiina CRPF ten thil tangkai tak tak an sem leh a dawngtu te chu:- Zemabawk ‘N’ Branch YMA leh Zemabawk Branch YMA hnenah Musical Instruments hrang hrang; Zotlang Primary School hnenah Computer Set; Female Handicapped Training Centre Social Welfare Department, Male Handicapped Training Centre Social Welfare Department, Residential Institute Training Centre Social Welfare Department leh Zotlang Tailoring Centre hnenah Puanthui Khawl te an ni a. Government Zemabawk HSS, Governtment Zemabawk H/ S, Zemabawk ‘N’ H/S, Governtment Durtlang H/S, Zuangtui H/S, Calvary Comp. School TNT, Govt. Lengpui Middle School- I, Govt. Lengpui Middle School- II, Govt. Airfield Middle School leh Falkland Upper Primary School hnenah Library a dah tur lehkhabu tha tak tak an pe a. First Aid Box chu Hermon Children’s Home Durtlang (P/S), Gilead Special School Falkland, Hmangaihte Run Zemabawk (MHIP), Turial Primary School-I, Airfield Primary School, Governtment Zemabawk Primary School-I, Governtment Zemabawk Primary School-III, Governtment Zemabawk Primary School-IV, Lengpui Primary School-I leh Lengpui Primary School-II te hnenah an pe bawk a ni.

Vawiina thilpek hlanna inkhawmah hian khawtlang hruaitute leh zirlai pawl hruaitute an tel a, Ist Batallion CRPF Commandant S. Radhakrishnan chuan inlawmna thu leh Civic Action Programme kalpui dan tlangpui a sawi a. Lawmthu sawina hun chu P. Peter, 2nd I/C, CRPF in a chang thung.