Mizoram Larsap Pu Vakkom Purushothaman chu ni hnih awh,(October ni 29 leh ni 30) Larsap te intawhkhawmna \'Conference of Governors\' Rashtrapati Bhawan, New Delhi a neihah a tel. He Conference-ah hian President, Vice-President, Prime Minister leh State hrang hranga Larsap te an tel a ni.
He Conference-a thusawitu Mizoram Larsap chuan Mizoram chu Hmarchhak biala state ralmuang ber, Peace Accord ziah ni atanga kum sawmhnih panga chuang zet a ral hnu pawha remna leh muanna in nghet taka zung a kaih tlatna ram anih avangin nasa takin hmasawnna kawngah Mizoramin ke a pen a ni, a ti a. Chutihlai chuan he ram hi ruihthei thil leh drugs bakah pawisa lem tawlhruk nan te, State thenawm Assam, Manipur leh Nagaland-a helpawl hrang hrang ten ralthuam tawlhrukna remchangah te Mizoram chu an hmang ve mek bawk a ni, a ti. Larsap chuan India leh Bangladesh ramri hung hna chu a kal tluang hle a, Border Security Force ten ramri an ven atangin dan kalha chetna awm thin pawh a ziaawm tawh hle a ni, a ti a. India leh Myanmar ramri vengtu Assam Rifles te pawn dan leh thupek kengkawhtu dangte nen tang tlangin ralthuam leh drugs tawlhruk thahnem tak an man tawh a, he pawikhawihna a inhnamhnawih tam zawk chu Myanmar lam mi an ni tiin Larsap chuan Drugs leh ralthuam tawlhruk tihtawp a nih theih nan ram pahnih te thawhona tun aia tih chak lehzual a tul hle a ni, a ti bawk.
Agriculture chungchang sawiin Larsap chuan mipui huapzo hmasawnna tluantling Mizoramin a neih theih nan sorkarin ruahmanna thar a duanchhuah New Land Use Policy (NLUP) chu January 14, 2011 khan a hman tan thu a tarlang a. He ruahmanna thar hian thingtlang lo neih(Jhum Cultivation) a eizawng tu te tan eizawnna ngelnghet leh tlo zawk siam sakin Mizoram sum leh pai dinhmun pawhin rahbi thar duhawm tak a chuangkai ngei dawn a ni, a ti.
Thlai thar a lo pun lehzual theih nan Larsap chuan buh tuhna thlawhhma zauh te, lo neih dan kalhmang tha zawk inzirtir te, thlai chawmna tur tui lakna hnianghnar tak pek te, check dam siam te leh kawng hrang hrangin lo nei mite tan sorkarin hma a lak thu a tarlang a. Larsap chuan tun dinhmunah Mizoram sorkar tana chona lian ber chu ruahtui ngawt ringa enkawl thin, lo leh huan te thar tam leh hlawk zawka kaihher te, lo neihdan phung pangngai chauha innghat lova enkawl dan tharlam leh darhzau zawk lakluh te, mahni kutke ngeia din eizawnna ngel nghet siam te leh thingtlanga cheng chhungkaw tin te dinhmun chawikan te a ni, a ti.
Autonomous District Council te chungchang pawh tarlangin Larsap chuan an hnathawh chu tha thawhkhat viau nia a ngaih thu a sawi a, Council te hian Sorkar Laipui atanga direct funding hmuhtheih an inbeisei thu leh fund tam zawk dawn an duh thu kalkhawm te hmaah a sawi lang nghal bawk a ni.
Zirna chungchang sawiin Larsap chuan Mizoram chu rampum huapa ziak leh chhiar thiam tamna ber pawl ani mek a, chutihrual chuan Technical leh Professional Course zirna College hmuh tur a awm manglo a, chuvangin hemi kawngah hian nasa takin Mizoram hi thuamchak a ngai a ni, a ti. Ram buai a nih ve loh avangin Mizoram sorkar chu hmasawnna hna thawk turin a insawrbing thei a, amaherawhchu sorkar laipui tanpuina sum ringawta innghat anih avangin hmasawnna ruhrel, ei leh bar dinhmun siam thatna kawngah duh anga chakin a thang theilo a ni, a ti a. Mizoramin sum hnar mumal a neih loh te, a ram leilungin a zir loh te, inkalpawhna kawng leh inbiakpawhna hmanrua that tawkloh te leh hunbi neilo a ruah nasa tak sur thut thut thin te hre rengin Mizoram hi State dang te aia ngaihpawimawh bik a tul a, he State hmasawnna atan hian Fund tam zawk pek a tul a ni, Mizoram Larsap chuan a ti.
