Ni 23 - 26 March, 2010 chhung khian 1st Bn. CRPF, leh Zemabawk Games & Sports Association tangkawp chuan Zemabawk veng chhunga team 14 te tan Football Tournament a buatsaih dawn a. Hei hi CRPF-in mipuite rawngbawlna chi khat, Civic Action Programme hnuaia an hmalakna a ni a, Tournament zawh tuk March ni 27, 2010 khian CRPF te chuan Aizawl khawpui chhunga sikul hrang hrang leh CRPF Post awmna khua Chawngte, Lawngtlai leh Tuirial (Kolasib)-ah te computer, lehkhabu, bookshelf, damdawi leh first-aid box an sem dawn bawk a ni.

Central Police Reserve Force (CRPF) hi 1939 khan din tan a ni a, tunah hian battalion 213 India ram hmun hrang hrangah an awm tawh a ni. Mizoram-ah chuan 1st Battalion CRPF dah an ni a, anni hi CRPF Battalion zingah pawh hmingtha leh thawktha, indona hmunah pawh Battalion huaisen tia hmingthang an ni nghe nghe. CRPF awmna apiang  state  mipuite nena inkungkaihna tha zawk siam nan ‘Civic Action Programme’ kaltlang hian khawtlang tihhmasawnna tur ruahmanna hrang hrang an nei a, tuna Zemabawk te nena Football Tournament an buatsaih tur pawh hi mipuite leh CRPF inkarah inhriathiamna leh inunauna tha ti pung tura hmanrua tha tak a nih an beisei a ni.