Mizoram Youth Commission (MYC) chuan an hnuaia Coaching Class kal, tun hnaia Mizoram Information Service (MIS) tling thar mi 2 - Malsawmsanga, Zonuam leh Lalnunmawii, Dinthar -  chawimawina inkhawm chu vawiin khan I&PR Conference Hall-ah a buatsaih a. MIS tling tharte chawimawina inkhawm hi MYC Chairman Pu Hmingdailova Khiangte, MLA-in a kaihruai a, Labour & Employment Minister Pu Lalrinliana Sailo chu Khuallian a ni.

Khuallian chuan MIS tling tharte hnenah Chawimawina Citation a hlan hnuah thu sawiin Mizoram Youth Commission chu Labour & Employment Department hnuaiah dah a nih tawh thu leh hemi kaltlanga sorkarin thalaite tan nasa taka hmalak chho zel a tum a ni, a ti. India-in khawvel ram dangte a tluk theih lohna lian tak pakhat chu ‘skill development’-ah a ni tih hriain sorkar laipui chuan thalai kum 14 - 29 inkarte chu eizawng thei khawpa thiamthil nei tura zirtirna pek theihna ruahmanna ‘Skill Development Initiative Scheme’ chu tan thuai a beisei awm thu leh hei hian Mizo thalaite tan pawh eizawnna kawng zau zawk a hawn ngei a rin thu Minister chuan a sawi a ni. Vocational Institution-te tihchangtlun nan sorkarin cheng vaibelchhe 5 a dah chu Lunglei leh Saiha District chhunga ITI leh thiamthil zirna in dangte leh skill development projects chi hrang hrang kalpui nan pek a nih thu a sawi bawk. Mizoram Youth Commission pawh sorkarin tihchangtlun chho zel a tum a, hei hian thalaite tana hmalaknate chak zawka kalpui a tih awlsam a beisei thu sawiin Khuallian chuan Mizoram-in a mamawh ber pakhat chu naupang leh thalaite chhawrtlaka chher chhuak thei zirtirtu tha a ni, a ti bawk.

Mizoram Youth Commission Chairman Pu Hmingdailova Khiangte chuan MYC hnuaia Coaching Class a thlawna ruahman a nih chu zirlaite tan thil vanneihthlak tak a ni tih sawi a. Coaching Class tam zawkten zirlai pakhatah cheng nuai 2 te an lak laiin Mizoram sorkar remhriatnain thalaite tan hetiang a thlawn liau liaua buatsaih a nih chu thalai tam zawkten chhawrna chang hria se a duhthu a sawichhuak a ni.