2899/2025-2026

Aizawl the 14th January 2025: Vawiin khan Mizoram CSR Cell chu an chairman Pu TBC Lalvenchhunga, Adviser to CM hovin online hmangin an thukhawm a. Mizoram CSR Connect portal hawn hun tur an sawiho.

Mizoramin Corporate Social Responsibility Fund tam zawk a hmuh ve theih nana a tulna apianga hma la tura a din CSR Cell te hian CSR pe thei Company lian te nena inpawhna tha zawk a awm theih nan, UNDP nena tangkawpin Bangalore ah CSR Conclave a zuk buatsaih tawh a, Mizoram chhungah ngei CSR dil thei register agency a pun theih nan kawng hrang hrangin hma a lo la tawh bawk a.

Heng CSR pe thei company te leh CSR Fund hmang thei register agency leh NGOs ten awlsam leh rang zawka an inhriattawnna tur te, project proposals an neih an inhriatsak zung zung nan online matchmaking portal a duang leh a. Chu portal chu a hmingah Mizoram CSR Connect a vuah a. Chu mi hawn hun tur chu vawiin hian an ruahman a ni. He portal hmang hian NGO leh Company te CSR atana thawh dun duh te thlunzawn a tih awlsam beisei a ni.

Tun thla January ni 27 khian a hawnna hun buatsaih tum a ni a. Vawiin meeting ah hian a programme kimchang pawm fel niin. Company hrang hrang te leh NGO te tel theih tura duan a ni a. Chief Minister chu a hawng tura beisei a ni.