3455/2024-2025

Dated Aizawl, the 10th December, 2024: Vawiin khan Mizoram CSR Cell buatsaihin MLA, Deputy Commissioners leh Civil Society Organisation hrang hrangte tan I&PR Conference Hall-ah Corporate Social Responsibility Fund hmuh dan inhrilh hriatna buatsaih a ni.

CSR Cell Chairman Pu TBC Lalvenchhunga, Adviser to CM chuan, Mizoramah CSR Fund hmang thei registered society leh foundation kan tlem avangin India rama CSR Fund hmang tlem ber state kan ni mek a, CSR fund hmang hian kan ram tan hmalakna tha leh lian tak tak kalpui theih a nih avangin a kal kawng hi kan hriat a ngai, a ti.

Chief Minister Office-a awm CSR Cell hi CSR diltu tura din a ni lova, CSR pe thei corporate leh a dil thei kan society leh agency te inkara palai hna thawh a ni zawk. Mizorama fund dil thei te leh fund pe thei te inzawm tawnna tur (match making platform) pawh kan siam mek a, Delhi leh Bangalore ah CSR chungchang ngaihvenin kan zin a, Cell hian a hrana Trust neih hial kan rilruk, a ti.

Pu Lalmalsawma Pachuau, Secretary, Planning chuan CSR cell nihphung leh kumin chhunga hma a lakna te a tarlang a. 14th November-a Bangalore-a UNDP nena tangkawpa CSR pe thin company te nena meeting an neih bawhzuina te pawh tarlangin, vawiinah Mizorama CSR dil thei awm chia ngaih te nen programme kan nei phawt ang a, kum tharah Corporate aiawh te leh vawiina kal khawmte inkawmna hun buatsaih leh thuai kan tum, tiin CSR Cell ruahmanna te a sawi.

Hemi hnu hian CSR lo hnuk chhuak tawhte leh CSR lam thiam bik ten an hmalak dan an sawi a, a dil thei tura registration neih dan te leh thil tul awm thei apiang an sawi a, kal khawmten zawhna an zawt bawk a. Project ziah dan tur inkawhhmuhna format pawh an inpe bawk.