3454/2024-2025

Aizawl, 10.12.2024: UD&PA Minister Pu K. Sapdanga chuan vawiin khan UD&PA Directorate Meeting Room-ah In sak tanpuina PMAY – Housing For All hamthatna dawng zinga sorkar laipuiin Mizoram atanga titha zual a thlanchhuah mi pathumte hnenah lawmman – PMAY-U Award a hlan. Lawmman dawngtute hi Lalmuanpuii, Champhai; Vansangliana, Mamit leh Lalramngheta, Kolasib te an ni.

UD&PA Minister chuan vawiin hian intihsiakna tha mi ah lawmman kan inpe a ni tiin lawmman dawngtute chu lawmman lak phu, mi entawntlak an nih thu a sawi a. An kutchhuak a hmuh atangin rilru dik tak pu a kuthhuak chhuanawm tak an nei chu mi ropui tak tak thenkat in an tluk loh a nih thu a sawi. Minister Pu K. Sapdanga chuan Sorkar in chhawmdawlna a ruahman hrang hrangte dik taka hman chuan rah tha leh hlawkthlak a chhuah thin thu a sawi a. Tangkai zawk emaw, tha zawka ngai a, ruahman loh anga tanpuina/ chhawmdawlna hmang sual te hi a tawpawh a pawi thin thu a sawi a ni. Vawiina lawmman dawngtute erawh dik taka an sum hmuhte an hman avangin chawimawi an phu thu sawiin, anmahni buaipuitu DUDO theuh te chungah pawh an kaihhruaina avangin lawmthu a sawi a ni.

Vawiin lawmman semna inkhawm hi Pu Lalmalsawma Pachuau, Secretary, UD&PA chuan kaihruaiin, Pu Jacob Lalawmpuia, Director & Mission Director-PMAY chuan report a pe a. Chhawmdawlna hi installment a pek a nih avangin beneficiary lamin an tih tur chin a hun taka an lo tih thin loh avangin installment dang an dawn belh theih loh phah thin thu a sawi. Vawiin programme-ah hian UD&PA Secretariat leh Directorate hotute official -te bakah Champhai, Mamit leh Kolasib DUDO-te an tel a ni.

Housing for All (Urban) hi India ram ah June, 2015 khan tlangzarh a ni a. Mizoram pawhin kum 2015 atang in bul kan tan ve nghal a. He Scheme hi kum 2022 thleng kalpui tur a ruahman a ni. Hei hi pawhsei leh niin kum 2024 December ni 31 thleng pawhsei leh a ni.

He scheme ah hian Vertical 4 a awm a. Mizoram ah "Beneficiary-led Construction" (Beneficiary ram nei. In sakna nei lo hnena Rs. 1,50,000/- hmanga insak tanpuina pek a ni a, hei bak ah hian Beneficiary in Rs. 50,000/- talin an do let ve tur a beisei an ni) leh "Credit Linked Subsidy Scheme" (Bank kal tlanga Loan pek a, Interest Subsidy pek) te hi kan kal pui mek a, mahse CLSS hi Central in a ti tawp rih a ni.

Mizoram chhunga Census Town 23 a huam a. BLC bikah hian Khawpui (Census Town) 23 tan Detailed Project Reports (DPRs) 51 siam tawh niin Ministry of Housing and Urban Affairs (MoHUA) hnuaia Central Sanctioning and Monitoring Committee (CSMC) Meeting pawhin a pawmpui tawh a ni.

Heng Khawpui 23 ah hian In 37,244 sak tur a ruahman na siam a ni a. Chumi atan chuan Project Cost ah Rs. 744.88 crore dah a ni. Ministry a tanga Central Assistance(CA) hmuh tura beisei zat hi Rs. 558.66 crore a ni. Mizoram a Khawpui 23 tan a sum kan hmuh tawh zawng zawng hi Rs 398.26 crore a ni a, sum hmuh tawh hi za zel ah 71.12% a ni.

Khawpui 23 ah in sak hna chak taka kalpui mek niin Beneficiary 36,796 te hnen ah In sak tanpuina sum Rs 394.47 crore hi sem chhuah tawh a ni a. Tunah hian beneficiary 1^st instalment hi mi 36,796 hnenah pek ani tawh a, 2^nd instalment hi mi 25,957 hnenah pek tawh niin, 3^rd instalment hi mi 5984 hnenah pek tawh a ni bawk.

PMAY(U) hnuaiah Mizoramin heng award te hi a dawng tawh a ni :-

i) Lawngtlai District in 'Best Performing Nagar Panchayat Award'

ii) Best House Construction Award hi Lalhmangaihzuali Lunglei. Rothanmawii Kolasib leh R.K Lianzuala, Kolasib ten an dawng tawh bawk.

iii) State Award 2023 hi Hon'ble Union Home Minister Shri. Amit Shah in AR ground-ah Pu Solomon-a Phunchawng leh Pi Lalthanpui Hunthar Veng a hnenah a hlan bawk a ni.

Vawina Award hlan tak hi '150 Days Challenge hnuaia Best House Construction Award 2021' niin heng mi Pathum te hian an dawng:

i) Lalmuanpuii, Champhai

ii) Lalramngheta, Kolasib

iii) Vansangliana, Mamit