3453/2024-2025

Aizawl, 10th December, 2024: Vawiin chawhma dar 11:00 khan Rural Development Minister Prof. Lalnilawma chuan Mizoram State Rural Livelihood Missions (MzSRLM) buatsaih 10th Regional Sales of Rural Artisans Society Fair (SARAS) Fair 2024 chu The Terrace Restaurant, Aijal Club-ah a hawng.

SARAS Fair hi MzSRLM bultumin kum 2015 atang khan neih ṭan a ni a. Kum tin State Capital leh District Headquarters a neih ṭhin tura ruahman  a ni a, Covid hripui leng leh inthlanpui ten a khaihlak ṭum tih lohah chuan tluang taka neih ṭhin a ni. SARAS Fair 2024 hi SARAS Fair vawi 10 neihna a ni a, December ni 10 aṭanga ni 16 chhung neih tur a ni. He hunah hian Mizoram hmun hrang hranga Self Help Group ten Stall 49 ah an thil siam te an pho chhuak a ni.

MzSRLM hi National Rural Livelihood Mission hnuaiah kum 2013 khan din a ni a. A tum ber chu thingtlanga cheng chhungkaw harsa zawk te Self Help Group (SHG) hmanga khaichhuah leh retheihna an kalsan hma ṭanpui a ni. MzSRLM hian Mizoram District 11 -a RD Block 28 te a tuamchhuak vek tawh a, khaw 706 ah SHG 10,425 ding tawhin, SHG hnuaiah hian chhungkaw  81,829 an inziaklut tawh a,  SHG-te khaikhawm tur hian Village Organisation 791 leh Cluster Level Federation 84 din a ni tawh bawk. 

He hunah hian khuallian RD Minister Prof. Lalnilawma chuan 10th Regional SARAS Fair, 2024 buatsaih a ni chu lawmawm a tih thu sawiin, SARAS Fair thil tum ber chu Self Help Group-te thil tharchhuah, hralh chhuah leh mipui hmaa pholanna remchan zawn a ni, a ti a. Amah ngei pawh chu Muizorama Self-Help Group bul tantute zingah a tel thu sawiin Self-Help Group hmasawnna a hmuhin ropui a tih thu a sawi a, Mohammad Yunus-a’n Bangladesh a miretheite chawikanna tura bul a tan thu sawiin ram retheite pual bik anga kan ngaih thin chu ram changkangte pawhin a thatzia an man fuh a, USA leh Europe lamah pawh an kalpui tan tawh hial a ni a ti a. SARAS Fair neih a nih theihna tura hma latu sawrkar official te chungah lawmthu a sawi a ni.

Rural Development Minister chuan SHG te chu bank nena inthlunzawm tura ruahman an nih thu sawiin, Public Sector Bank nena inthlunzawm SHG 347 a awn thu sawiin loan an lak tawh zat hi cheng nuai 568 a  ni tawh a, Regional Rural Bank nena inthlunzawm SHG 3871 niin loan an hmuh tawh zat chu cheng nuai 5930 a ni a ti a, Cooperative Bank nena inthlunzawm SHG  208 awmin loan cheng nuai 249 hmuh a nih tawh thu a sawi bawk. Mizoram puma SHG te revolving fund hi cheng vaibelchhe 15 vel a ni tih sawiin, Community Investment Fund (CIF) Cluster Level Federation atanga SHG hnena loan pekchhuah hi cheng vaibelchhe 136.16 a ni a ti a, hei aia tam hi achieve turin hma kan la zel ang a ti.

Prof. Nitea chuan SHG te thawhrimna a hmuhin lawmawm a tih thin thu a sawi a, an thil siamchhuahte ah a quality tihhmasawn ngai ang chite a awm nual tih sawiin mithiamte rawnin hmalak tum mek a ni a ti a. Mipui hip thei tur berin a tuamna (packaging) leh a hming pek (labelling) te pawh tihchangkan a tul thu sawiin sum sen belh ngai a awm pawhin hma kan la ang a, theihtawp kan rawn chhuah ang a ti a. Mizoram pawn leh India ram pawna thawn chhuah theih tura quality tha siam tum a nih thu sawiin, an khawl/hmanraw chhiate pawh MzSRLM hnenah an report chuan a theih ang anga siam that sak tum a nih thu sawiin, CLF hrang hrangte te office sakna tur pawh kawng dap a nih thu sawiin a tahtawla sa tura ruahmanna siam mek a nih thu a sawi a ni. Minister chuan mipuite chu ramdang thilsiam aia SHG te thilsiam hlut sak a, hnam rilru pu chunga dawr zel turin a ngen a. Hmasawn ngaihna laiah mipuite thurawn dawng turin a enkawl Department chu an inpeih reng tih a sawi bawk a ni.

SARAS Fair hawnna inkhawmah hian lawmman chi hrang hrang siam a ni a, lawmman dawngtute chu :-

1.    Best Berforming Block – Serchhip BMMU, Serchhip RD Block

2.    Outstanding Service Award – Far park Cluster Level Federation, Sangau RD Block

3.    Best Performing CLF – Tuikum CLF, Serchhip RD Block

4.    Community Service Award – Meidum VO, Bilkhawthlir RD Block

Minister hian lawmman te hi a hlan a, lawmman hian Memento, Certificate leh tangkafai Rs. 20,000/- theuh a keng tel a ni.

SARAS Fair hawnna inkhawmah hian Pu R. Zarzosanga, IAS, State Mission Director, MzSRLM chuan inlawmna thu a sawi a,  Pi Zosangzuali Pachuau, MCS, CEO, MzSRLM chuan SARAS Fair leh MzSRLM chungchang report a pe a. Dr. Zomuankima, COO, MzSRLM in lawmthu sawina neiin hun a khar a ni