3452/2024-2025

Serchhip the 10th December, 2024 : Vawiin khan July-September, 2024 chhunga Serchhip District khaw hrang hranga Bank te hnathawh dan thlirletna District Level Committee neih a ni a. Serchhip DC Pu Paul L Khuma kaihhruaina hnuaiah he meeting hi Serchhip DC Meeting Hall-ah neih a ni.

Pu Paul L.Khuma chuan bank te hi mipui mimirte sum leh pai dinhmun siamthatna atana hmanraw pawimawh ber pawl an ni a, an pawimawhzia inhria a mipui rawng an bawlna kawngah tan an lak a ngai a ni, a ti. Loan pekchhuah chungchangah te, mipuite hamthatna tur bank hmanga pek chhuah kawngah te tan la lehzual turin a chah a. Bank hnufual deuh te pawh review meeting neih leh hunah report tha zawk nei tura tang tur leh, Serchhip District chu District dangte tan pawha entawntlak an nih theih nan tan la turin a fuih a ni.

Serchhip District chhungah hian Bank panga - SBI, MRB, MCAB, PNB leh HDFC ten Branch an nei mek a. Heng bank hrang hrang tea mipuite sum dah Deposit tling khawm chu cheng nuai 52014.56 a ni a, loan an pek chhuah zat tling khawm chu cheng nuai 37930.35 a ni. Report atanga a lan danin September quarter bikah Serchhip District chhunga bank hrang hrang te deposit hmuh zat atanga mipuite hnena an puk tir (loan) zat Credit Deposit Ratio chuan 0.17% in hma a sawn a, 72.92% a ni mek a. CD ratio a hnufual bik bank pangate chu an hniam chhan sawifiah tir niin tan la turin hriattir an ni.

September quarter chhung hian Serchhip District a bank ten Agriculture Loan an pekchhuah zat belhkhawm chu cheng nuai 2692.51 a ni a, an target za zelah 40.17% an tlin tawh a ni. MSME ah hian target za zelah 51.58% an tlin tawh a, ngaih pawimawh zual bik priority sector hnuaia hian an loan pekchhuah tur target 37.59% an tlin tawh a ni.

Priority Sector bikah District chhunga bank hrang hrang atanga loan puk mi 5257 an awm a, heng zinga mi 226 te hian an rul tha lo a. Loan chhia (Non Performing Assets) tlingkhawm hi cheng nuai 338.02 a ni.

Serchhip DC Pu Paul L Khuma chuan meeting ah hian NABARD buatsaih Potential Linked Credit Plan (PLP) 2025-26 chu Serchhip District tan a tlangzarh nghal bawk a ni.

Vawiin meeting ah hian Lead Bank Manager Pu Robert Z Parte bakah Serchhip District chhunga Bank Branch hrang hrang Manager te leh Department thenkhat aiawhte an tel a ni.