3451/2024-2025

2024 Pawltlak thla ni 10: Vawiin khan Tlabunga Zodin Multipurpose Primary Agricultural Credit Cooperative Society (MPACS) Ltd Office chu Mizoram Cooperative Apex Bank Ltd (MCAB) Chairman Pu Lalnunsanga chuan a hawng.

Pu Lalnunsanga chuan Zodin MPACS office hawn a ni chu lawmawm a tih thu sawiin, society member-te'n rinawmna leh taimakna nena he MPACS Ltd hi an kalpui chuan Tlabung leh a chhehvela cheng mipuite tan hmasawnna rahbi pawimawh tak a ni ngei ang, a ti.

Zodin MPACS office hawn pual inkhawm chu Zodin YMA Zawlbukah buatsaih niin, Zodin MPACS Chairman-in hun a kaihruai a. Pro Pastor Zoengmawia'n hunserh hmangin, Executive Officer & Secretary-in report a pe a. Lunglei District Cooperative Union Ltd (LDCU) hruaitute hnen aṭangin fuihna thu ngaihthlak niin, Pu ZD Zosangliana'n lawm thu a sawi hnuah MPACS Treasurer-in ṭawngṭaiin hun a khar a ni.

Multipurpose Primary Agricultural Credit Cooperative Societies Ltd hi Cooperative Societies Act hnuaiah sumdawnna chi hrang hrang khawih thei tura duan a nih bakah, Reserve Bank of India (RBI) phalna hnuaiah pawisa dah ṭhat leh sum puk theihna a ni a. Bank-in a tlawh pawh loh India ram thingtlang khaw hrang hranga bank ai awh thei tura duan a ni.

Tlabung Zodin MPACS Ltd hian A-Class member 41 leh B-Class member 81 an nei a. Zodin MPACS Ltd hnuaiah hian department kal tlangin chhungkaw thlan bik hnenah thlai chi chi hrang hrang sem niin, chhungkaw 4 hnenah tui dah khawlna (tanky) pek a ni tawh a. State sawrkar handholding policy hnuaia thlai thar hralh turah society te hi rin nghal niin, sawhthing lei tura inremna (MoU) ziahpui an ni a. Empanelment buyer niin, sawrkar aṭangin buyer certificate pawh an dawng fel tawh a. Hmunphiah leh aieng buyer ni tur pawhin registration an tifel tawh bawk a ni.