3221/2022-2023
Aizawl, the 12th January 2023: Vawiin khan Puilo khuaa Health Clinic Centre building sak thar chu Lengteng bialtu MLA Dr. L.Thangmawia'n a hawng.

He building hi Puilo a camp nei mek, DBL Company Pvt. Ltd. tena MLA ngenna anga CSR Fund cheng nuai 6 an pek hmanga sak a ni a, He centre a thawk tur hian Health Worker pakhat leh staff pakhat dah nghal a ni bawk.

Hawnna inkhawm Puilo Community Hall a neihah hian Dr Thangmawia chuan thusawiin tunah chuan Lengteng bial chhunga khua zawng zawngah Health Sub/Clinic Centre a lo awm kim ta a, a hnuhnung ber atana Puilo a Health Clinic Centre hawn a lo ni ta chu Pathian hruaina leh Lengteng bial mipuite min thawhpui thatzia tilangtu a ni a ti.

Puilo khua in Health Clinic Centre a lo nei ve ta chu a lawmpui thu a sawi a, tunah chuan Puilo atanga damlo, raipuar leh vaccine la tura khawdanga kal zel ngai thin chu vawiin atangin a lo tawp dawn ta a ni tiin Puilo khawtlang pawhin he centre ti changtlung tura an tih theih apiang ti turin a chah a. He centre a thawktu te tha taka lo thawhpui turin khawtlang mipui a chah a. A dilna ngai pawimawha Puilo a Health Clinic Centre building sakna tur sum petu DBL Company te chungah Puilo khawtlang aiawhin lawmthu ka sawi a ni a ti.

He hunah hian DBL Company lam atangin Pu Rajesh Beniwal, Director leh a thawhpui dangte bakah Pu C.Lalthanzira Addl SPD Samagra leh Khawzawl SDC Pu Obed Lalmalsawma MCS te an tel a.

He hun hi Pu K.Lalremruata, VCP in kaihhruaiin Upa Zaliana'n hunserh a hmang a, Pu C.Lalthansanga, Vice President, VC in lawmthu sawiin hun a khar a ni.