No.878/2021-2022

Lunglei the 9th June, 2021 - Lunglei DC Pu Kulothungan A, IAS hmalakna in India ram chhung hmun hrang hrang-a NGO foundation/Company/Corporation te atangin CSR kaltlangin Lunglei District bakah chhim lam mipuite tana hlawkpui leh tangkaipui theih tur Medical lam kaihhnawih bungraw hrang hrang dil a ni a. Heng zingah hian ACT Grants & Swasth Alliance, New Delhi atangin Oxygen Concentrator sawmli (40) leh BiPAP Ventilator paruk (6) a thawn man te nen cheng nuai sawmnga (Rs. 50,00,000/-) man hu dawn a ni a. Hemi bakah hian O2 for India Org atangin Oxygen Concentrator panga (5) a thawn man te nen cheng nuai ruk (Rs. 6,00,000/-) man hu dawn bawk a ni.

Heti hian Covid-19 hrileng dona tura Lunglei District-a CSR kaltlanga medical equipment hrang hrang dawn tawh te chu a vaiin tun dinhmunah cheng nuai sawmriat pahnih leh sing nga (Rs. 82,50,000/-) man hu a tling tawh a ni.

Heng medical equipments te H&FW Department hnena hlanna chu vawiin chawhma khan Lunglei DC Office ah neih niin DC Pu Kulothungan A chuan Lunglei CMO Dr LC Liana, Medical Superintendent DR SR Ngurchamliana leh SMO Dr Lalrinthangi te hnenah a hlan a. Heng hmanrua leh bungrua te hi Lunglei District chhunga CCC, 4C, CQC leh mamawhna dangah te sem chhuah tur niin Lunglei DC chuan H&FW hotute chu a tangkai thei ang bera hmang tur leh deployment plan pawh mumal taka ruahman turin a chah a ni.

Covid-19 damlote leh anmahni enkawltute hmanraw mamawh tak tak ngaihvena chah chhuak tu Lunglei DC chungah H&FW Department hotute chuan lawmthu sawiin kar hmasa zirtawpni a bungrua lo dawn tawh te pawh District chhunga Covid-19 damlote enkawl nan tangkai taka hman nghal mek anih thu an sawi a ni.

Covid-19 hrileng avanga Mizoram in-a hun khirh tak kan tawn mek karah mipuite tana hman tangkai theih tur medical bungraw hrang hrang phal taka pe tu Pi Saloni Mehta leh Pi Natasha Prakash (ACT Grants & Swasth Alliance, New Delhi); Pu Satish Ambati (Founder, O2 for India Org) bakah bungraw lakkhawm leh Mizoram-a thawnchhuah chungchangah a buaipuitu Pu Priyank Kishore, IAS te chungah Lunglei Bawrhsap Pu Kulothungan A, chuan Lunglei District mipuite aiawhin thinglung takin lawmthu a sawi a ni.