No.879/2021-2022

Aizawl, the 9th June 2021 : Planning & Programme Implementation Department chuan Sustainable Development Goals India Index 3.0 (2020-21) a Mizoram dinhmun chungchangah a hnuai ami angin vawiin khan Press Note an tichhuak.

United Nations (UN) in a kalpui mek Sustainable Development Goal (SDGs) "Agenda 2030' an tih bawk, tih hlawhtlinna kawngah Mizoram in nasa takin hma a sawn

NITI Aayog in ram chhung State hrang hrangte leh Union Territory (UTs) te SDGs tih hlawhtlinna kawnga an hmalakna leh hmasawnna zir chianna SDGs India Index 3.0 (2020-21) chu tunhnai mai khan a tichhuak a. Hetah hian Goal 17 atangin Goal 15 hmangin State/UTs te chu an dinhmun zir chiangin, tehna (indicators) eng emaw zat hmangin index scoring 100 atang zela goal tina an score zat chhut chhuah a ni a. He index hmanga tehna atang hian Mizoram chuan nasa takin hma a sawn a. India ram pumpui State zawng zawng zingah ati tha berte zingah telin dinhmun 7-na (7th rank) a hauh pha a ni.

Kum 2018 atang khan kum tinin NITI Aayog in ram chhung State hrang hrangte leh Union Territory (UTs) te SDGs tih hlawhtlinna kawnga kan thlen chin leh dinhmun tlangpui tarlangin ranking a tichhuak thin a, tun tum ranking tih chhuah thar berah hian a pumpuiah Mizoram score hi 100 zelah 68 niin hei hi National Score ai pawhin a tha zawka, nikum 2019-20 (Index 2.0) report aia Mizoram thanna hi 12% lai ani. North East State dang te nen khaikhin in North East pumpuiah Mizoram chuan dinhmun 2-na hauhin Sikkim dawtah kan awm a. India ram state zawng zawng zinga titha ber chu Kerala a ni a, Himachal Pradesh leh Tamil Nadu ten dawtin Assam, Jharkhand leh Bihar State te a hnuai berah an awm a ni.