No.1573/2021-2022

Lunglei the 27th July, 2021 - Lunglei DC Pu Kulothungan A, IAS hmalakna in India ram chhung hmun hrang hrang-a NGO foundation/ Company/ Corporation te atangin CSR kaltlangin mipuite tana hlawkpui leh tangkai pui theih tur Medical lam kaihhnawih bungraw hrang hrang ngaihven chhunzawm zel a ni.

Heng zingah hian foundation pathum (3) ten tanpuina hrang hrang an rawn pe a ni:

1. Paytm Foundation atangin Oxygen Concentrator 20, cheng nuai 15 man hu.

2. ACT Grants, New Delhi atangin Oxygen Cylinder 15, cheng nuai hnih sing nga (Rs. 2.50 lakhs) man hu leh

3. World Vision, India, Chennai atangin PPE Kits, N-95 Mask, Surgical mask, Oximeter, Face Shield etc cheng nuai 10 man hu dawn a ni.

Heng medical equipments leh Covid-19 laka invenna hmanrua te hi Lunglei CMO Office, Lunglei Civil Hospital leh Christian Hospital Serkawn-te bakah town area VLTF-te leh sawrkar Department a hmatawnga thawktute – Police, UD&PA, I&PR, Excise & Narcotics leh Fire & Emergency Services-ah te sem an ni.

Sem chhuahna inkhawm vawiin chawhma Lunglei DC Conference Hall-a neihah DC Pu Kulothungan A chuan Covid-19 hrileng avanga hun rei tak kan buai tawh karah a hmatawnga awm VLTF-te leh sawrkar Department-te tha thlah lova theihtawp an chhuah chhunzawm zel avangin an chungah lawmthu a sawi a. An duty naah fimkhur tur leh harsatna an neihte District administration ah thlen vat thin turin a chah a ni.

Covid-19 hrileng avanga Mizoram in hun khirh leh harsa tak kan tawn mek karah mipuite tana hman tangkai theih tur medical bungraw hrang hrang phal taka pe tu foundation hrang hrang te bakah bungraw lakkhawm leh Mizoram–a thawnchhuah chungchangah a buaipuitu Pu Priyank Kishore, IAS chungah Lunglei District mipuite aiawhin thinlung takin lawmthu a sawi a ni.