209/2025-2026

Aizawl, 17^th April, 2025 : Vawiin chawhma khan Pu Lalmuanpuia Punte, Political Adviser to Chief Minister chuan a pisa-ah All Mizoram CSS Employees Coordination Committee hruaitute kawmin an harsatna tawhte a sawipui a, Adviser to CM hi Pu H. Lalengmawia, Chief Secretary charge la mektuin a tawiawm a ni.

Vawiin inkawmhonaah hian All Mizoram CSS Employees Coordination Committee hruaitute chuan an dinhmun leh an harsatna tawhte an sawifiah a, Mizoramah CSS hnuaia lak sawrkar hnathawk 10000 chuang an awm thu sawiin hun rei tak ata tawh an dinhmun tha zawka siam a nih theih nan an beih tawh thin thu an sawi a, sawrkarin inhawng taka indawr tawn theihna kawng a buatsaih sak chu lawmawm an tih sawiin, sawrkar chungah pawh beiseina sang tak an neih thu an sawi a ni.

Pu Lalmuanpuia Punte chuan Chief Minister-in CSS hnuaia hnathawkte a ngaih pawimawh thu sawiin an nawrhna sut turin All Mizoram CSS Employees Coordination Committee hruaitute a ngen a, an harsatna tawhte pawh Chief Minister a sawipui tur thu leh anmahni pawhin Chief Minister an hmuh theih hun remchang siam a nih tur thu a sawi a, an harsatna tawhte chinfel a nih theih nan nawrh an kalpui lai mek sut a dawhkan kila tha taka sawiho a pawimawh thu a sawi, All Mizoram CSS Employees Coordination Committee hruaitute pawhin sawrkarin an harsatnate a ngaih pawimawh sak a inbiakna hun a ruahman avanga lawmthu sawiin boruak tha tak hnuaiah an inkawm a ni.