4032/2023-2024

LUNGLEI; Vau Thla tahrik ni 1,2024: Mizoram hmun dang te rualin Lunglei-ah pawh Chapchar Kût,2024 chu ropui takin C.Thuamluaia Mualah chawhma dar 10:30 atanga hman tan lawm a ni a. Pi Lalrinpuii, Hon’ble Minister for Health & Family Welfare,etc. chuan Kût Nu niin Chapchar Kût,2024 hi a hmanpui a.Pi Ramdinliani IAS, Deputy Commissioner, Lunglei District chu Kût thlengtu  a ni thung.

Kumin Chapchar Kût lawmna programme hi session thuma then niin, session khatna hi Official programme a hman a ni a. Session hnihna hi Hnam lam leh Special items te entirna hun a tan hman niin, a session thumna hi mal zai leh concert hun atana hman a ni.

1st session hi Pu K. Lalzuala , President, YMA Sub-Hqrs. leh Co-Chairman Chapchar Kut Organising Committee ni bawkin a kaihruaia, Rev R. Labiakliana, General Secretary BCM Hqrs, Lunglei chuan hunserh hmangin, YMA Sub-Hqrs. Lunglei  ten "Ro min relsak ang che" tih hla an rem a. Pu Zothanzuala Hnamte ,Secretary YMA Sub-Hqrs. leh Secretary, Chapchar Kut Organising Committee ni bawk chuan Inhmelhriattirna leh Report pekna hun a hman zawhah  Kût Nu Pi Lalrinpuii hnen atangin Chapchar kût thuchah ngaihthlak a ni.

Kût Nu Pi Rinpuii chuan “Zo nun zemawi, kan hnam kalphung leh tihdan tha te vawng him a, chawi nung zel tura vawiin a Chapchar Kut kan han hmang ho thei hi a ropui ka tiin, ka lawm tak zet a ni.Pathianin hetiang ang Kut nei thei tur leh, hmang chho zel thei tur hian HNAM angin min din a, A mi kaihhruai chhoh tawhna zawng zawngah pawh lawmthu ka sawi a, min kaihruai zui zel tur pawh hian kan Pathian lo hi chu rintlak dang kan nei lo tih hi vawiin ni hian ka sawi duh a.

Chapchar kût mizo ten kan hmanna a rei tawh hle. Kumpinu Sawrkarin Mizoram a awp lai, 1930 vel atang khan Bawrhsâp phalnain hman tan leh a ni a. Mahse, vantlang huap lovin mi lungleng mi tlem tein Aizawl veng thenkhatah an hmang a. Hetiang hian hun eng emawti chhung chu vantlang huap lovin hman a ni.1952-a District Council neih a nih hnuah Council chuan Mizo ni pawimawh bik humhalh nan kum sawmhnih chhung chu kum tin March 9-11 hi Pisa chawlhah a lo puang tawh a. Heti chung pawh hian vantiang huapin an la kut thei chuang lova. Mipui vantlang huapa Chapchar Kut hman leh hmasak ber chu March 9, 1960 khan a ni a. A kum leh 1961 March 14-a kut an hman khan kohhran lam atangin sawiselna nasa tak kârah an hmang chho ve zel a. 1964 kuma kût hmannaah mi thenkhatin chainaa intulh tur zu an lo keng lut a. Kohhranin nasa lehzualin a sawisel a. Kohhran mite chu kutnaa tel a khap ta a. Chuta chin 1972 thleng chu Mizoram buai khan a lo thuahhnih bawk nen Kut hman chhunzawm a ni ta lo a ni.Mizoram U.T.-a hlankai a nih hnu khan rambuai boruak tlemin a lo ziaawm hret hret a. Chutih laiin Kohhran lam rilru pawh a lo zau tial tial bawk a. 1973 atang khan Chapchar Kut chu hman tan leh niin tun thleng hian khaihlak hauh lovin kan lo hmang thei ta a, a lawmawm tak zet a ni. Kan hnam tana Pathian remruat a nih ngei a rinawm.

Chapchar Kut hi "Remna Kut" a ni thin a. Vawiinah pawh he kût himangtu zawng zawngte hnenah hian "Remthu leng rawh se”.Kan pi puten puithu taka-kut laia : nupa inhauh te,intih thinurte,intihtlante thiang lova an lo ngaihna thinlung khan kan rilru luah thar leh se la.Chapchar Kut hi kan hnam ni pawimawh, hnam hmel lanna hun, hnamzia min ngaihsantirtu a ni a. A neituten ngaih pawimawh nachâng kan hriat loh chuan hnam dangin min ngaih pawimawh sak dawn lo a ni. Chuvangin, mitin kut boruakah cheng turin ka sawm che u a. Pi puten 'mahni lu lam kan ni ngai e' an lo tih thin kha-Vawiin ni hian hlim takin I kut ang u. Keimahni berin nuam kan tih chuan chu chuan a chhimtu tur zin veivakmi - tourist kan tihte pawh a hip thei anga, tourism lamah pawh hma kan sawn phah ngei ang.

Vawiin a chapchar kut kan hmandanah pawh hian kan hnam tihdan leh kalphung neihsa ti hausa belh tur zawnga ngaihtuahna thar hman a ni te, thil thar tam tak chhawp chhuah a ni hi ka lawm hle mai a. Hmanlai kan pi leh pute tihdan ang ngau ngau ringawt mai a hmang lo in, tunlai rilru milin, hmanlai tihdan tha chhawmnung zel chung si in, mitinin tel vena leh tihtur kan neih a, nuam kan tih theuh theihna tura ngaihtuahna sen chhoh zel te pawh a tha ang.

Vawiin kan 'Kût' kan hman atang hian "Zonun zemawi - Tlawmngaihna" lo vul thar leh zel se. Tunlai hmasawnna leh changkanna avang hian kan tlawmngaihna lan chhuah dan pawh hi a danglam chho zel a ni thei.Amaherawtichu tlawmngaihna zepui leh laimu- ‘Tlawmingaihna chuan mahni hma a sial lo a, a beisei let lo a, a infak lo a, a uang lo a, hausa leh rethei a thliar ngai to a, a huaisenin a chhel em em a, a zaidam bawk’ tih hi a la pangngai reng a, chuvangin tunlai mila he tlawmngaihna zepul leh taimu hi lanchhuah tir thiam zel turin ka chah duh bawk che u a ni.

Kan hriat theuh angin Ruihlo in kan ram a run mek a. Kan thalai tam takte chu engmah ngaihtuah thei lo leh engmah ti thei lo in ruihhlo bawihah an tang mek a, chhungkua a rum a, hnam in a tuar bawk a, ram in kan mangan pui mek a ni. Ruihhlo laka kan thalaite kan venhim a, a bawiha tang tawhsa te kan chhanchhuah theihna tur chuan kan thalai te hian thil buaipui tur, thil tih tur an neih angai a.

Hmanlai kan pi leh pute hunlai kha chuan - hnathawk lo a awm mai mai te kha mi hrisel tha pangngai leh thalai tan chuan thil zahthlak a ni thin.

Hawh u, mahni chhungkua theuh atanga bul tan in, kan thalai te tan huau huau lam ringawt ni lo, thildang buaipui tur tha, te lua awmlo in thil tihtur hmachhawp (goals) I zawng tlang ila, kan tihtur hmachhawp te hlenchhuak thel turin tangrual a,infuihin,chu chuan chhungkuaah hmasawnna min thlen anga, chhungkaw hrang hrang hmasawnna chuan ram hmasawnna a thlen ngei ang” tiin Chapchar Kût,2024 thuchah a sawi.

Kût thlengtu Pi Ramdinliani,IAS district bawrhsap chuan lawmthu sawinain session khatna chu khar ta a ni.

Kumin Chapchar Kût lawmna-ah hian MUP ten Hlado chhamin; tlâng an tlir a, MHIP Sub-Hqrs. leh YMA Branch hrang hrang ten Hnam lam chi hrang hrang: Sarlamkai, Cheraw kan, Chawnglaizawn,Chheih lam, khual lam, Siktui thiang lam,etc.te an entir a. Special item leh Midley te pawh MCAA( Mizo Cultural Artist Association), Lunglei leh Nursing School ten an entir bawk. Zaithiam mi 14 in mal zai leh YMA Sub-Hqrs zaipawl ten zaiin mipui an awi reng bawk a ni.

Lunglei Photographer Association leh MJA Lunglei ten Chapchar Kût Hrâite leh Chapchar Kût Miss chu Kût chhimtu mipui zing atangin an thlang chhuak a, Chapchar Kût-2024 Miss atan Zorampari Rahsi Vengthlan a ni a. Chapchar Kût-2024 Hrâite atan Mipa 

1st Jonathan Lawmsangzuala 

2nd Ezra Lalhruaitluanga 

3rd Lalremruata Ralte 

 Hmeichhia- ah 

1st Angel Lalruattluangi,Venglai

 2nd Emely Lalrohlui, Zohnuai

 3rd Faith Lalduhsaki,Salem Veng te thlan an ni bawk.

C.Thuamluaia Muala neih Chapchar Kût,2024-ah hian  stall te siamin, ei tur chi hrang hrang, hnam incheina thawmhnaw leh tlereuh leh thil dang dang hralhchhuah a ni a, Photo Booth leh Photo Gallery te pawh siam niin, mipui ten an hlut hle a ni.