4031/2023-2024

Chapchar Kut, 2024 chu Mizoram hmundang rualin Champhai ah pawh vawiin ropui taka lawm a ni.

Chapchat Kut lawmna hi Zotlang Sports Complex-ah hman niin Lt. Col. Clement Lalhmingthanga, MLA Champhai South A/C chu Kut Pa niin District Bawrhsap Pu James Lalrinchhana chu Kut thlengtu a ni.

Kut pa Lt. Col. Lalhmingthanga, Champhai South A/C bialtu MLA chuan Mizote chuan Kut pathum kan nei tih sawiin, Chapchat Kut, Pawl kut leh Mim Kut kan hman thin thu a sawi a, Pawl Kut chu naupang puala hman thin niin Mim Kut chu mitthi puala hman thin a nih thu a sawi a, Chapchar Kut erawh chu Kut kan nei zinga ropui ber a nih thu a sawi.

Chapchar Kut alo chhuah dan tarlangin, lo lam tul a zawh hnuah awllen laiin Pasaltha ram vak hlawhchhama haw te thinlung thawi dam nan an khaw lal in ran hrang hrang hmanga tlang hraiin an chai thin a, hlim takin chu ni chu an hmang thin a, a kum lehah pawh chu ni chu hmang zui ta thin in, Chapchar Kut tiin a hming an vuah ta niin a sawi a, tunlai ah chuan Kum tin March thla a Zirtawpni hmasa berah Chapchar Kut hi hman thin a nih thu a sawi a, Chapchar Kut chuan kan pipute nunah tlawmngaihna leh nundan mawi a hril chhuak thin tih a sawi a, Chapchar Kut hmang tur hian ram lam hna la thawk zo lote puiin, lo an zawh pui thin thu a sawi a, Chapchar Kut chu inremna niah hmang thinin inhauh a thiang lo tih a sawi.

Kut Pa chuan District in hriselna, zirna, tui leh kawng tha kan mamawh te sawrkar ah a thlen thu tarlangin Sangha chi keimahniin kan thar theihna tura hmala turin sawrkar in min tiam tawh a ti a, Dam lo phurhna tur Helicopter changtlung zawk kan neihna tur te, Hospital chang tlung zawka thuam tura hma lak a nih thu leh In kal pawhna kawng a that theihna tura hma lak a nih thu a sawi a, Sumdawnna kawnga eizawng tam tak an awm angin hemi kawnga hmasawnna a awm theihna tura hma an lak thu leh Session zawhah chuan hlawhtlinna duhawm an hmuh ngei a beisei thu a sawi a, Champhai mipuite Chapchar Kut Chibai a buk a ni.

Kut thlengtu Pu James Lalrinchhana, District Bawrhsap chuan kalkhawmte lawmna thu sawiin hnam a siamtu Pathian hre reng chung leh Chapchar Kut hlutna hre reng chungah Mizo nunze mawi lanchhuahtir chunga hun hlimawm tak hmang turin kalkhawm te duhsakna a hlan a, Pastor E. Vanlalpeka Zote, UPC NEI chuan hunserh hmangin District MUP ten hlado an chham a ni. Thuthmun Branch YMA Chhangte'n Sarlamkai an entir a, Vengthlang Branch YMA te'n Lai, Mara leh Thado inthuamna an entir ve bawk. PES Zotlang te Pawnto in, thuthmun Branch YMA hrang hrangte atangin Mizo Hnam lam chi hrang hrang thlirho niin Cheraw an kan a, Amosa Vocal Point leh Champhai Zaithiamte bakah Guest Artist Zaii Hauchhum te an zai a, Sub Hqrs. MHIP thuthmun Branch ten Parlam an entir ve bawk. SYMA Cultural Troupe te kaihhruainain Chaia hun hmasa khar a ni.

Chapchar Kut 2024 ah hian naupang inchei nalh mipa leh hmeichhia thlan an ni a, kum 5 hnuailam mipa ah Lalremruata Chawngthu, Electric Veng chu thlan niin hmeichhia ah Remruatsaki, Vengsang thlan a ni. Kum 6 atanga kum 10 inkar ah Vanmalsawma, Zotlang chu mipa ah inchei nalh ber a thlan a ni a, hmeichhia ah Juliat Remruatfeli, Vengthlang thlan a ni ve bawk.

Chapchar Kut Lanu thlan niin Nl. Malsawmzuali, Electric Veng chu Chapchar Kut Lanu 2024 atan thlan a ni a, Lalrinhlui Kahrawt chu pahnihna niin VL Thlamuanpuii, Electric Veng chu pathumna a ni.