4030/2023-2024

Mamit 1st Vau thla 2024 : Mizoram chhung hmundangte rual Chapchar Kut, 2024 chu vawiin khan Tennis Court, Mangkhawngdai Field-ah ropui taka hman a ni a. Kutpa Pu H. Lalrinthanga, President MUP Sub Hqrs. niin kut thlengtu atan Pu V.L Remliana, District Bawrhsap a ni.

Kutpa Pu H. Lalrinthanga, President MUP chuan zofate tana Kut pawimawh tak Chapchar Kut hmang tura kalkhawm zawng zawngte kut chibai a buk a. Hmanlai kan pi leh pute'n hlim leh uar taka an lo hman thin a nih angin, thangtharte pawhin mizo hnam nunzia pholanna leh hnam nun tarlan nan, Kristian kan nihna nena inhne rem taka hlim taka kan hman a duh thu a sawi. Zo nun zemawi, tlawmngaihna chu mizo tawh phawt chuan kan nunpui tur a nih angin Kut hmangtu zawng zawngte'n kan hriat thar a duh thu sawiin mawhphurhna nei zawng zawngte duhsakna a hlan.

Kut thlengtu Pu V.L Remliana, District Bawrhsap pawhin Chapchar Kut chu hlimna kut a nih angin hlim taka hmang tute a sawm a. Kut hmang tura kalkhawmte chu zo nun zemawi, tlawmngaihna chhawm nungtu ni zel turin a chah bawk.

Vawiin kut hmanna-ah hian Mizo hnam lam chi hrang hrang Sub Hqrs YMA, Town Branch YMA, MCO leh MHIP atang te'n entir a ni a, Venghlun Br. YMA atangin Costume Parade entir a ni. Zaithiam Vanlalhlana leh District chhunga zai mite'n kalkhawmte an awi a. Mipui kalkhawm zawng zawngte tan chaipui neih a ni bawk.

Chapchar Kut 2024 thupui atan hian zo nun zemawi, tlawmngaihna tih chu hman a ni.

Chapchar Kut 2024 hmanna hmuna kalte atangin Kut Nula atan C.Lalpekhlui, Mamit Hnarveng thlan niin, pahnihna Esther Malsawmtluangi, Bazar veng a ni a. Pathumna Lalruatkimi, Hmarveng a ni. Kut naupang mipa leh hmeichhia pathum ve ve thlanchhuah an ni bawk a, Hmeichhe naupangah hian pakhatna Liansangpuii, Dinthar a ni a, Mipa naupangah hian pakhatna Austin Zohlupuia, Dinthar a ni bawk. Chapchar Kut puala thlanchhuahte hnenah hian Pawisa fai leh citation hlan an ni.