4029/2023-2024

Hnahthial the 1st March 2024: Zofate kut ngaihhlut hlawh ber leh lawm hlawh ber te zinga mi Chapchar kut lawmna chu Hnahthial North-II, VC field, Bazar veng, Hnahthial-ah neih a ni a, South Tuipui Bialtu MLA Pu Jeje Lalpekhlua chu Kut pa niin District Bawrhsap Pu Chuauhnuna chu Kut thlengtu a ni.

Chapchar kut 2024 lawmnaah hian Kut Pa, Bialtu MLA ni bawk chuan Chapchar Kut hmang tura kalkhawmte chu chibai bukin hlim taka hmang theuh turin duhsakna a hlan. Chapchar kut chu Mizo hnam ziarang phochhuahna hun a ni a ti a, Mizo hnahthlakte inunauna leh inpumkhat thar lehna, Remna leh Muanna chawi nuna a awm zel theih nan vawiin kut chu hmanruaah chang se a duh thu a sawi.

Bialtu MLA Pu Jeje Lalpekhlua chuan sawrkar in kut hnathawktute a ngai pawimawh hle a ti a, sawrkar hmalakna hrang hrangte tarlangin miharsa zawk ten dam loh nikhuaa senso an hmuh let leh theihna tura duan Health Care Bill tang zawng zawng kumin financial year thlen hma ngeia pek a nih tur thu te, khualkhuaa ruang phurh ngai phurh thlenna tur sum sorkar in budget-a a dah thu te, tar pension (Old Age Pension) cheng sang khat (1000) a tihpun a ni te chu lawmawm a tih hle thu a sawi. A sawi zelna ah Bialtu MLA chuan an sawrkar Flagship Programme "Bana Kaih Policy" tihpuitlinna atana budget-a sum thahnem tak dah a ni te chu kuthnathawka eizawng te, thalaite tan chuan thil lawmawm tak, chona thar a nih a beisei thu a sawi bawk. Hnahthial District-a hmasawnna thar te tarlangin cheng nuai sang khat zasarih senga damdawi in khum 50 awm theihna sak tur te, District Horticulture tih hmasawnna atan cheng nuai za sawm hnih senga Warehouse sak turte tarlangin District Transport Office (DTO) pawh Hnahthialah hawn a nih thuai a beisei thu te bakah 132kV Sub Station te, Buhfai dah khawlna tur Godown lian zawk sak tur te, DLO Office leh District Panchayat Resource Centre sak mek te, Urban Health & Wellness Centre sak mai tur te, mipui tên awlsam zawka bialtu MLA an dawr theih na tura duan MLA Office Hnahthiala hawn a ni ta te, bial mipui damlo te tan Zoram Medical College (ZMC) a thlenna in tur Falkawna buatsaih mek pawh hun reiloteah hawn theih a nih tur thu sawiin a lawmawm hle a ti bawk. Pu Jeje Lalpekhlua chuan Bial mipuite zarah Mizoram rorelna in sang bera thu theia a awm chu vannei a inti hle a, hmasawnna nasa zawk South Tuipui bialin a hmuh theih nan theihtawp chhuah a tawiawm a, thurawn pe thin turin leh tawngtai pui thin turin a ngen nghal bawk. Chapchar Kut chu Mizo hnam tana Kut pawimawh, hnam hmel lanna hun, hnamzia ngaihsantirtu a ni a ti a, Mizo Nun Zemawi; aia upa zahna te, rinawmna te, taihmakna te, dikna te, tlawmngaihnate neih thar lehna kut ni se tiin hlim taka kut hmang vek turin kalkhawmte duhsakna a hlan.

Kut thlengtu District Bawrhsap Pu Chuauhnuna chuan kalkhawmte chu Chapchar kut 2024 chibai a buk a, Kut puala hun hlimawm tak buatsaih a ni chu lawmawm a tih thu a sawi. Chapchar kut organising committee te sawmna ngai pawimawh a Bialtu MLA Pu Jeje Lalpekhlua’n Kut Pa a lo nih avangin lawmthu a sawi a, sub-hqrts YMA ten an tha leh zung, hun leh ngaituahnate senga kut hlawhtling tak an huaihawt avangin lawmthu a sawi bawk. Mipui te chu hlim taka kut turin a sawm a, vawiin hun hlawhtlinna chu mipui kalkhawmte an ni tiin hlim leh lawm taka hmang theuh turin duhsakna a hlan bawk.

Vawiin kut lawmnaah hian Pu R Rochhunga, Chapchar kut Organising Committee Chairman chu Chairman niin Pastor RK Vanlalrawna, Seventhday Adventist chuan hunserh a hmang. BCM Hnahthial N Pastor Bial zaipawl tên opening song neiin MUP Sub Hqrts, Hnahthial ten hlado chhamna an nei bawk. Vawiin kut lawmna ah hian Hnahthial khaw chhunga YMA branch hrang hrang ten Hnam lam chi hrang hrang entirin, zaithiam thahnem tak te nen hlir taka hun hman ho a ni a, Pu B Lalhmingliana, President Sub Hqrts YMA chuan lawmthu a sawi. Chapchar kut 2024 pual hian kut nula thlan a ni bawk a ni a, kut lawmna tualah hian food stall te bakah Mizo Hnam inthuamna hrang hrang a duh apiang tan lei theihin phochhuah a ni bawk.