4028/2023-2024

Lawngtlai dated 1st March 2024: Vawiin khan Lawngtlai DC pisa tualzawl ah Chapchar Kut 2024 lawmna hun hman a ni a. Pu Cheemala Siva Gopal Reddy, Deputy Commissioner chu Kut Pa niin Pu H.Liantluanga, President, MUP Lawngtlai chu Kut thlengtu a ni.

Kut pa, Pu Cheemala Siva Gopal Reddy, Deputy Commissioner chuan mahni hnam ziarang vawn nun pawimawh zia sawiin hnam ropui te chuan an mahni hnam thuam, lam leh ziarang hrang hrang pho chhuah leh chawisan an uar hle thu a sawi a. Chapchar kut chu hnam ziarang pho chhuah mai bak ah hnam dangin mizo an hriat larna, tlawmngaihna leh aia upa zah thiam hnam an nihna chu chawi nung zel turin a chah bawk a ni. Mizo chu hnam huaisen, lal leh pasalṭha entawntlak tak tak awmna a nih avangin hnam vannei tak an nih thu a sawi a Lalnu Ropuiliani chanchin tawi pawh Azadi ka Amrit Mahotsav pual a mi huaisen tar chhuah zing ah a tel thu a sawi. 

Kut pa chuan hnam ang a dinchhuah nan zirna leh thiam thil hmantlak neih a ṭul thu sawiin zirna kawng ah hmasawn tum zel turin kalkhawmte a chah a. Hnam ang a chim ral kan nih loh nan zirna hmangin kan hnam kan venhim a pawimawh thu a sawiin kut hlimawm tak hmang turin kalkhamwte duhsakna a hlan bawk a ni.

Kut thlengtu Pu H.Liantluanga, President, MUP chuan Chapchar Kut chu hnam ziarang phochhuahna hun pawimawh tak a nih thu sawiin hnam thuam leh ziarangte chu zahpui lova phochhuah uar zel turin kalkhawmte a chah a. Chapchar kut chu Zofate inpumkhatna tinghet leh zualna hun ṭangkai a hmang turin a chah bawk a ni. Lawngtlaia Chapchar Kut lawmna ah hian sawrkar office hrang hrang a thawktute, CYLA, MUP, MHIP, LWA hruaitute an tel a. Hnam lam leh zaite entir niin Chapchar kut Miss thlanna te neih a ni a, Pi Margaret J Vanlalremmawii, SDO(S) chuan lawmthu sawina hun a hmang bawk a ni.