Mizo thalai te zinga hnam nun zepui harhtharna (cultural revival) thleng mekah hian khawpui nula leh tlangval mai ni lovin Mizoram pumpui a tuamchhuak mek a, hetihlai hian kan hnam nun zemawi tlawmngaihna leh mite tana inpekna kawngah hian engtinnge chak zawka hma kan lak ang tih ngaihtuah a tul, Art & Culture Minister Pu PC Zoram Sangliana’n a ti.
He thu hi vawiina Aizawl West College Cultural Day, Dawrpui Vengthar YMA Hall-a a hmanpui tuma a sawi a ni a. Minister chuan culture reng reng chu sakhua a a innghah loh chuan a puitling tak tak thei ngailo, tiin Mizo culture pawh hi Isua Krista ah a innghah a tul a ni, a ti. Kum 2010-a Cheraw hmanga World Record Mizo thalai ten an siam khan nghawng tha tak nei chho zelin thangtharte Mizo hnam nun chawisanna kawngah an harh thar a, kha World Record khan Mizo hnam zia leh nihna kengtu silh leh fen (costume) khawvel mithmuhah a pholang a, khawvelin Mizo hnam a hria a, Cheraw hi Mizo hnam ta ngei a ni tih khawvel hriatah a tarlang a ni, Pu PC Zoram Sangliana chuan a ti. Mimal nun infawkkhawmin khawtlang nun a siam a, khawtlang nun infawkkhawmin hnam nunpui (culture) a siam avangin Mizo culture vawng nung tur leh chawisang zel turin mimal tin an pawimawh tih hre thar leh turin kalkhawm te Art &Culture Minister chuan a sawm a ni.
Aizawl West College Cultural Club-te buatsaih Cultural Day hi an Chairman, Asst. Professor Pu T Vanlawma’n kaihruaiin Principal Dr Laithanzauva’n inlawmna thu a sawi a, Vice Principal Dr P Lalremliana’n ‘Mizo Culture Vawnhim Pawimawhna’ tih thupui hmangin thu a sawi a. Zai leh hnam lam chi hrang hrang entir a nih bakah hnam incheina lantirna leh lemchan hmuhnawm tak te he Cultural Day-ah hian thlirho tur a awm a ni.
