Lunglei Bawrhsap office chuan Lunglei a Kendriya Vidyalaya school (KVS) lo in tan dan leh tihtawp a nih hnua hawn that leh a nih dan mipui hriata puanzar tul nia a hriat avang in hemi chungchangah hian thuchhuah a siam a. Sawrkar lehkha pawimawh atanga a lan dan in kum 2003 March thla ah Silchar KVS atangin Assistant Commissioner lo kal in Lunglei hmuna KVS dinna tur hmun ram ruak a rawn en a. Ram ruak a awm loh avangin Lunglei Ramthar venga mimal ram 129094sq. feet chu lei phalna Revenue Department in order No.K.15011/32/92-REV dated 23.5.2003 a tihchhuah hnuah Silchar KVS hian ram leina tur Rs.21,95,598/- a rawn release a. Land Lease tihfel a nih hnuin November 2003 ah Classroom 10, ramri hungna, chawkidar shed, inthiarna leh tuizem siamna senso atan Silchar KVS bawk in Rs.25,37,000/- a rawn sanction leh a. Kum 2004 atangin he school ah hian class kalpui tan a ni.

Ni 3.11.2010 a New Delhi a KVS Board of Governors, Union HRD Minister Pu kapil Sibal hova thukhawm chuan KVS school norms bawhchhia a tih 7 zingah Lunglei KVS hi a dah tel a,chuvang chuan Lunglei KVS chu auction tur leh auction atanga sum hmuh atangin Lunglei KVS ram leina chu rulh tura tih a ni. He school tha tak kum 5 lai loding tawh chan mai chu sawrkarin tha a ti lova. Chief Minister Pu Lal Thanhawla HPC chairman nibawk hova Lunglei High Powered Committee ni 5.8.2011 a thukhawm chuan Lunglei KVS ram leina atana senso Rs.21,95,598/- chu KVS Account ah chhunluh a rel a. He sum hi HPC Office, Chief Planning Officer chuan sanction order No.D.11011/9/2011-HPC(L)/37 dated 16.4.2012 hmangin a release hnuin Lunglei Bawrhsap chuan 2.5.2012 ah KVS Lunglei Account ah a chhunglut a tunah KVS Lunglei chu India ram hmundanga KVS te ang bawk a pangai taka kalpui a ni a. Changtlung zawk a rawn thawm that KVS thuneitu ten an tum thu leh HPC hmalakna chu Lunglei District tan thil lawmawm tak leh hmasawnna mellung pawimawh tak a nih thu Bawrhsap chuan a sawi bawk a ni.